FHN dövlət büdcəsi ilə tikdiyi evin qiymətini açıqlamır

Zaqatala rayonunun Çobankol kəndində 2012-ci ildə baş verən zəlzələ zamanı dağılan evlərdən birinin yerində tikilən ev 7 il sonra yanaraq məhv olub. 

Anews.az "qafqazinfo"ya istinadla xəbər verir ki, həmin evin sahibi zəlzədən sonra rəsmi şəxslərin onun evinə gələrək yoxlama apardıqlarını bildirir: "Sübut olundu ki, ev qəzalı vəziyyətdədir və bu haqda rəy verildi. Daha sonra dövlət büdcəsindən ayrılan vəsaitlə Fövqəladə Hallar Nazirliyi bizim üçün ev tikdi. Ev də icbari qaydada sığortalandı. 2019-cu il iyulun 27-də evim yanaraq kül oldu. Amma sığorta şirkəti evin dəyərindən çox az pul təklif edir”. 

Zaqatala Rayon İcra Hakimiyyəti başçısının birinci müavini, Fövqəladə Hallar Komissiyasının sədri Tofiq Əhmədov rəsmi məktubla E.Atayevə cavab verərək bildirib ki, Zaqatala rayonunda zəlzələdən sonra qəzalı vəziyyətə düşmüş fərdi yaşayış evlərinin tikintisi Fövqəladə Hallar Nazirliyi tərəfindən aparıldığından istənilən məlumatları almaq üçün bu quruma müraciət etmək tövsiyə olunur.

E.Atayev qeyd edir ki, Fövqəladə Hallar Nazirliyi bu barədə məlumatın məxfi olduğunu bildirir: "Sorğuların əksəriyyəti cavabsız qalıb, amma bir dəfə cavab yazıblar. Onda da yazıblar ki, evin qiyməti daxili istifadə üçün nəzərdə tutulub, açıqlana bilməz: "Burada hansı məxfilikdən söhbət gedə bilər? Dövlət büdcəsindən ayrılan pulun xərclənməsi şəffaf olmalıdır. Birincisi, dövlət büdcəsindən ayrılan vəsaitin xərclənməsindən söhbət gedir. İkincisi də, öz evimə adi olan məlumatı mənə vermirlər. Yəqin sənədlərdə xərclənən vəsaitin məbləği şişirdilib, daha çox göstərilib. Bu üzdən rəqəmləri açıqlamaq istəmirlər”.