“Demokratiyanın və Milli Dəyərlərin Təbliği” İB konfrans keçirdi - FOTOLAR

Bu gün “Demokratiyanın və Milli Dəyərlərin Təbliği” İctimai Birliyinin Azərbaycan Respublikası Prezidenti yanında QHT Dövlət Dəstəyi Şurasının maliyyə dəstəyilə həyata keçirtdiyi “interaktiv təlim sistemini tətbiq etməklə şagirdlərdə vətən sevgisi hisslərinin aşılanması” mövzusunda keçirdiyi təlimlərin son nəticələri barədə mətbuat konfransı keçirib.

Mətbuat konfransı Azərbaycan Dövlət Himninin səslənməsiylə başladı. Sonra təlimin rəhbəri Əli  Cəfərov bildirdi ki, təlim planına uyğun olaraq, hər qrupa kurukilum sistemi ilə iki təlim keçirilib. O, şagirdlərlə birgə Şəhidlər Xiyabanında olduğunu, vətənpərvərlik mövzusunda söhbətlər etdiyini vurğuladı.

Ə.Cəfərov qeyd etdi ki, bu təlimin keçirilməsində əsas məqsəd gənc nəsildə vətənpərvərlik hisslərini gücləndirmək, məktəb-valideyn münasibətlərini tənzimləmək, eyni zamanda ənənəvi təlim sistemindən fərqli olaraq, milli kurikulum sisteminin üstünlüklərini şagirdlərə və valideynlərə izah etməkdən ibarət olub.

“Təlimlər nəticəsində valideynlər bir daha milli kurikulum sisteminin üstünlüklərinin əyani şahidi oldular. Onlar gördülər ki, milli kurikulum sistemi ilə tədris zamanı şagirdlərdə idraki təfəkkür inkişaf edir, onlarda kollektiv təəssübkeşlik formalaşır, eyni zamanda sərbəst nitq qabiliyyətləri təkmilləşir”, - deyə təşkilat sədri əlavə etdi.

Onun sözlərinə görə, təlimlərin sonunda iştirakçılarla diplomlar təqdim olunub.