Nazir şagirdi döyməkdə günahlandırılan direktoru işdən çıxardı

Bunu AzNews.az-a açıqlmasında Ombudsman Aparatının İşgəncələrin qarşısının alınması şöbəsinin müdiri və Milli Preventiv Qrupunun rəhbəri Vüqar Məhərrəmov deyib. 

O bildirib ki, qeyd olunan məktəbin II sinif şagirdi, 2006-cı il təvəllüdlü Cavadov Nahid Zaur oğlunun bu ilin mayın 16-da məktəbin direktoru Afaqət Əsgərova tərəfindən döyülərək, xəsarət yetirilməsi ilə bağlı adıçəkilən tədris müəssisəsində araşdırmalara başlanılıb. 

V. Məhərrəmov araşdırma prosesində Ombudsman Aparatının nümayəndələrinin də iştirak etdiyini qeyd edib: “Məsələnin ciddi araşdırılmasında bizim qurum da iştirak etdi. Araşdırmada Baş Prokrurluq, Təhsil və Daxili İşlər nazirlikləri, o cümlədən bir sıra dövlət qurumları da iştirak etdi. Məlum olduğu kimi şagirdin döyülməsi və bu məsələdə günahkarın məktəb direktoru Afaqət Əsgərova olması isə sübuta yetirilmədi. Lakin Afaqət Əsgərovanın işində başqa ciddi nöqsanlar ortaya çıxdığından o, Əmək Məcəlləsinin müvafiq maddələrinə uyğun olaraq vəzifəsindən kənarlaşdırıldı”.

Xatırladaq ki, bəzi KİV-lərdə və sosial şəbəkələrdə Suraxanı rayonunda yerləşən Sağlamlıq imkanları məhdud uşaqlar üçün 7 saylı xüsusi internat məktəbinin II sinif şagirdi, 2006-cı il təvəllüdlü Cavadov Nahid Zaur oğlunun bu ilin mayın 16-da məktəbin direktoru Afaqət Əsgərova tərəfindən döyülərək, xəsarət yetirilməsi barədə məlumat yayılmışdı. 

Məsələ ilə bağlı Təhsil Nazirliyi və Baş Prokurorluq şikayətlə bağlı birgə araşdırma aparıb. Məlum olub ki, N. Cavadov mayın 16-da saat 17:00 radələrində məktəbin sanitar qovşağına gedərkən müvazinətini itirərək yıxılıb və nəticədə də baş nahiyəsindən xəsarət alıb.