“Döyüşdə yaralanan oğluma dərmanlarını ala bilmirəm”

"Oğlum Kənan Musayev İkinci Qarabağ müharibəsində bir ayağını itirib, əməliyyat olunub. Lakin əməliyyatdan sonra onunla heç kim maraqlanmır. Ona lazım olan dərmanları qonşuların köməyiylə alırıq”.


Bunu "Qafqazinfo”ya Qazax rayonunda yerləşən "Kənd Təsərrüfatı Texnikomu yataqxanası" adlanan yerdə məskunlaşmış 19 yaşlı qazinin anası Məhəbbət Məmmədova bildirib. Onun iddiasına görə, işsiz olduğuna və heç bir əlavə gəlir yeri olmadığına görə, oğluna lazım olan tibbi vasitələri almaqda çətinlik çəkir:


"Oğlum Kənan Musayev Qarabağ döyüşlərində sol ayağını itirib. Buna baxmayaraq, bizimlə heç kəs maraqlanmır. Oğlumun sarğı ləvazimatlarını, dərmanlarını və kastelini qonşularımın köməyi ilə özüm almışam. Hətta sarığını belə mən baxa bilmədiyim üçün qonşular dəyişir. İcra nümayəndəliyindən bir dəfə gəlib hər şeyi yoluna qoyacaqlarını deyib gediblər, hələ bir xəbər yoxdur”.


M. Məmmədovanın sözlərinə görə, ötən gün sosial şəbəkədə etdiyi müraciətdən sonra Qazax rayon İcra Hakimiyyəti başçısının müavini Məmməd Alıyev onlarla görüşüb. Yaşadıqları yataqxanaya qaz çəkiləcəyini vəd edib: "Bizim yataqxana pis vəziyyətdədir, qazımız yoxdur. İcra başçısının müavini dedi ki, bu gün yataqxanaya qaz çəkiləcək. Bir də mənim işlə təmin olunmağıma kömək edəcəklər. Amma hələ bir xəbər yoxdur, gözləyirik”.


M. Məmmədova bildirib ki, oğlu Kənan Musayev ilk dəfə minaya düşən gün Naftalan Mərkəzi Xəstəxanasında əməliyyat olunub. Bundan sonra Mingəçevir Mərkəzi Xəstəxanasına göndərilib və iki dəfə də orada əməliyyat olunub. Bir müddət xəstəxanada yatdıqdan sonra qazi evinə gətirilib və o vaxtdan evdə müalicə alır. Ananın sözlərinə görə, 15 gündən sonra yenidən ona komissiya baxmalı və ayağı üçün protez verilməlidir. 


Problemlə bağlı Qazax rayon İcra Hakimiyyəti ilə əlaqə saxladıq. İcra Hakimiyyətindən bildirildi ki, ailəyə müəyyən miqdarda köməklik olunub. İcra başçısının müavini ailə ilə görüşüb və nə vəd verilibsə, yerinə yetiriləcək. 

www.anews.az