Bakıda ər arvadını, kişi kürəkənini bıçaqladı

Ötən gün ərzində daxili işlər orqanlarının paytaxt şöbələri tərəfindən ikisi Bakının Binəqədi rayonunda olmaqla üç nəfərin ağır xəsarət alması ilə nəticələnən hadisələr qeydə alınıb.


Anews.az-a bu barədə hüquq-mühafizə orqanlarından məlumat verilib.


Dərnəgül qəsəbəsində 13 dekabr, saat 21:00 radələrində 1985-ci il təvəllüdlü yerli sakin Vüsal Kazımov ailə münaqişəsi zəminində həyat yoldaşı, 1997-ci il təvəllüdlü Aygün Ruhullayevaya dərinə nüfuz edən bıçaq xəsarəti yetirib. Nəticədə ağır vəziyyətdə olan qadın 3 saylı şəhər klinik xəstəxanasına yerləşdirilib, əri isə Binəqədi rayon 5-ci Polis Bölməsinin əməkdaşları tərəfindən tutulub.


Biləcəri qəsəbəsində dekabrın 14-nə keçən gecə Oğuz rayon sakini 1980-ci il təvəllüdlü Ceyhun Hüseynov ağır yaralanıb. Zərərçəkən qarın və bud nahiyəsindən iki dəfə nüfuz edən bıçaq yarası alıb və bu səbəbdən o, 3 saylı şəhər klinik xəstəxanasına aparılıb. Hazırda əməliyyatçılar cinayətkarın şəxsiyyətinin müəyyənləşdirilməsi üzərində işləyir.


Sabunçu rayonunda 13 dekabr eyni adlı qəsəbə sakini, 1972-ci il təvəllüdlü Salik Abuzərov ailə münaqişəsi zamanı kürəkəni, 1995-ci il təvəllüdlü Göyçay rayon sakini Mövsun Qəhrəmanovu qarınından ağır yaralayıb. 12-ci Polis Bölməsinin əməkdaşları tərəfindən həyata keçirilən əməliyyat-axtarış tədbirləri nəticəsində S. Abuzərov tutulub.


Ramella İbrahimxəlilova

www.anews.az