DİN nümayəndələri Bakıdakı insidentə görə şəhid ailələri ilə görüşdü

Daxili İşlər Nazirliyinin nümayəndələri dünən Səbail rayonunda toplaşan və həmin zaman polislərlə onlar arasında insident yaşanan şəhid ailələri ilə görüşüblər.

Anews.az-ın verdiyi xəbərə görə, bu gün DİN-in yüksək rütbəli əməkdaşları və müvafiq rayon icra hakimiyyətinin başçısı həmin beş şəhid ailəsi ilə təklikdə görüşərək onların problemləri ilə maraqlanıblar. 

Həmin ailələlərin nəzərinə çatdırılıb ki, toplaşma zamanı istəmədən kobud ifadə işlədən polis əməkdaşı özü də Ağdam rayonundan məcburi köçkün və şəhid oğludur. Həmin polis əməkdaşının atası da Birinci Qarabağ Müharibəsində şəhid olub. Onun atasının dəfn edildiyi ərazi isə ermənilər tərəfindən işğal edilib və qəbiristanlıq dağıdıldığı üçün hazırda həmin polis əməkdaşının atasının məzarı yoxdur. 

Şəhid ailələri göstərilən diqqətə görə DİN rəhbərliyinə minnətdarlıqlarını bildiriblər.