Şəkidə məskunlaşan məcburi köçkünün sürpriz qonağı

Avropa Azərbaycan Cəmiyyətinin (AAC) dəvəti ilə ölkəmizdə səfərdə olan Böyük Britaniya-Azərbaycan parlamentlərarası dostluq qrupunun üzvləri mayın 30-da Şəkidə olublar.Böyük Britaniya Parlamentinin İcmalar Palatasının üzvü, dostluq qrupunun rəhbəri Kristofer Pinçerin rəhbərlik etdiyi nümayəndə heyətinin tərkibinə parlamentin deputatları daxil olub.Səfər çərçivəsində qonaqlar Şəki rayonunda məcburi köçkünlər üçün yeni salınmış “Çələbixan” qəsəbəsinə baş çəkib, burada məskunlaşan köçkün ailələrindən birinin qonağı olub, çay süfrəsi ətrafında səmimi söhbət ediblər. Qonaqların diqqətinə çatdırılıb ki, 2012-ci ilin sentyabrında Prezident İlham Əliyevin iştirakı ilə açılışı olan bu qəsəbədə 423 məcburi köçkün ailəsi yaşayır.Sonra nümayəndə heyəti qəsəbədə fəaliyyət göstərən məktəbdə yaradılan şəraitlə tanış olub.Məlumat verilib ki, qəsəbədə, həmçinin uşaq bağçası, klub-icma mərkəzi, həkim məntəqəsi və poçt binası inşa edilib.Şəkiyə səfəri çərçivəsində Böyük Britaniya Parlamentinin nümayəndə heyəti şəhərin görməli yerlərini gəzmiş, XVIII əsrə aid dünya əhəmiyyətli tarixi-memarlıq abidəsi olan Şəki xanlarının sarayı və XIX əsrə aid “Yuxarı Karvansaray” mehmanxana-kompleksi ilə tanış olub.//AzərTAc