Güzəştli mənzil seçiminin sınaq versiyası istifadəyə verildi

Bu gün "Güzəştli mənzil” sisteminin satış modulunun və gözləmə qaydasında mənzil seçiminin sınaq (demo) versiyası istifadəyə verilib.


Mənzil İnşaatı Dövlət Agentliyindən Oxu.Az-a verilən məlumata əsasən, müvafiq xidmət istifadəçilərə həm satış, həm də gözləmə qaydasında mənzil seçimi proseslərinin bütün mərhələləri ilə yaxından tanış olmaq, elektron imza sertifikatlarından və texniki avadanlıqlarından istifadə bacarıqlarını təkmilləşdirmək imkanı yaradır.


Satış modulunun və gözləmə qaydasında mənzil seçiminin sınaq versiyası 30 iyun 2021-ci il tarixi saat 00:00-dək aktiv olacaq.


"Güzəştli mənzil” sistemində elektron kabinetə yeni sahib olmuş vətəndaşlar kabinetin yaradılması ilə bağlı qərarın verildiyi tarixin növbəti günündən etibarən həm satış modulunun, həm də gözləmə qaydasında mənzil seçiminin sınaq versiyasından istifadə edə bilərlər.


Qeyd edək ki, sınaq versiya vasitəsilə həyata keçirilən mənzillərin seçimi təlim xarakteri daşıyır və heç bir nəticə yaratmır.

www.anews.az