Prokurorluq Biləsuvardakı qətllə bağlı MƏLUMAT YAYDI - YENİLƏNİB

İyunun 12-də saat 07 radələrində Biləsuvar rayon sakinləri Nurlan Rüstəmovun bıçaqlanaraq xəsarət alması, Sadiq Abıyevin isə bıçaqlanması nəticəsində ölməsi barədə rayon prokurorluğuna məlumat daxil olub.


Biləsuvar rayon prokurorluğundan Anews.az-a verilən məlumata görə, aparılan araşdırmalarla müəyyən edilib ki, Biləsuvar rayon sakini Məhəmməd Fərəcli qeyd edilən tarixdə "Qazel” markalı avtomaşınla rayonun Ağayrı kəndində yerləşən pambıq səhəsinə işləməyə gedərkən onunla birlikdə həmin avtomaşında olan Nurlan Rüstəmov və Sadiq Abıyev ilə şəxsi münasibətlər zəminində aralarında yaranmış mübahisə zamanı bıçaqla sonunculara xəsarət yetirib, nəticədə Sadiq Abıyev almış olduğu xəsarətlərdən hadisə yerində ölüb.


Faktla bağlı rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb. Məhəmməd Fərəcli şübhəli şəxs qismində tutularaq istintaqa cəlb edilib.


***


12:44


Biləsuvar rayonunda qətl hadisəsi törədilib.


Anews.az xəbər verir ki, hadisə rayonun Ağayrı kəndində qeydə alınıb.


Belə ki, Biləsuvar şəhər sakini, iş yoldaşları olan 1998-ci il təvəllüdlü Fərəcli Məhəmməd Füzuli oğlu və rayonun Ağayrı kənd sakini, 2004-ci il təvəllüdlü Abıyev Sadiq Namiq oğlu arasında münaqişə baş verib. Nəticədə sonuncu bıçaqla qətlə yetirilib.


Faktla bağlı Biləsuvar Rayon Prokurorluğunda cinayət işi açılıb

www.anews.az