Bakıda qəsəbə qara tüstüyə büründü

Suraxanı rayonunun Qaraçuxur qəsəbəsi, demək olar ki, qara tüstüyə bürünüb.ANS TV-nin məlumatına görə, 16-cı mədən küçəsinin sakinləri deyirlər ki, metaləritmə sexinin tüstüsü onların gününü qara edib, amma bununla da iş bitməyib, hətta evlərin həyətyanı sahələrində yaşıl bitkilər qaralıb, ağ göyərçin də rəngini dəyişməyə başlayıb. Üstəgəl sexin çirkab suları evlərin həyətyanı sahəsindən keçdiyinə görə həyət-bacada ev quşları, hətta ev iti belə saxlamaq mümkünsüzləşib.Ərazidə kimi evini satıb, kimisə başqa bir yerdə kirayə qalmaq məcburiyyətində qalıb. Sakinlər deyirlər ki, son iki ildə metaləritmə sexinin tüstüsü onlara rahatlıq vermir. Bundan başqa onu da bildirdilər ki, bizim gəlişimizlə əlaqədar sex fəaliyyətini müvəqqəti dayandırıb. Ancaq buna baxmayaraq sakinlər sexin tüstüsünü ətrafı bürüyən vaxt çəkə biliblər.Axşam saatlarında ağır tonnajlı yüklərin metal boruların yerə çırpılması nəticəsində evlərdə çatlar yaranıb. Bununla bağlı aidiyyatı qurumlara da müraciət edilib.Elə biz də şikayətçilərlə bərabər sexə girib bütün bu problemlərin nə vaxt aradan qaldırılacağını öyrənmək istədikdə qapıda bizi özünü mühafizəçi kimi təqdim edən şəxs qarşıladı. Çəkilişə icazə vermədi və bildirdi ki, problem bu ayın sonuna qədər həll olunacaq.Bu cavabla kifayətləməyib Suraxanı Rayon İcra Hakimiyyətinə üz tutduq. Qurumun sektor müdiri Altun Quliyevin sözlərinə görə, ötən gün rayon icra hakimiyyətinin başçısı sözügedən ünvanda yaşayan sakinləri qəbul edib, onların problemini dinləyib. Artıq bu həftə ərzində problemin həlli üçün konkret addımlar atılacaq.Suraxanı RİH-nin sektor müdiri Altun Quliyev onu da bildirdi ki, həmin yerdə sex Hüseyn MMC-yə məxsusdur. Və bu zavodun hansı növ istehsalla məşğul olması tam surətdə araşdırılacaq. ANN.Az