Bakı metrosunda qadın maşinistlərin sayı artırılır

"Bakı Metropolteni" QSC-nin bu il fevralın 1-dən 15-nə qədər maşinisti peşəsi üzrə etdiyi seçim turları başa çatıb.

Bu barədə qurumdan bildirilib.

Məlumata görə, müsabiqədə ali texniki və orta texniki təhsilli, ilk peşə ixtisaslı 24-30 yaşı arasında olan kişi və qadınlar iştirak edib. Kişi namizədlərdən yararlılıq kateqoriyası ilə üçün həqiqi hərbi xidmət keçməsi də əsas tələblərdən biri olub.

Elan nəticəsində 300 nəfərə qədər müraciət qeydə alınıb. Bütün tələblərə uyğun gələn 170 namizəddən metropolitenin təlim-tədris mərkəzində birinci mərhələdə 125 iddiaçı iştirak edib. Qeyd etmək lazımdır ki, bu mərhələdə iddiaçılar məntiq və metropolitenlə bağlı ibtidai biliklərdən ibarət testlə yoxlanılıblar.

 

Onlardan 35 nəfər müsbət nəticə göstərərək müsahibə və testdən ibarət olan psixoloji sınaq mərhələsinə vəsiqə qazanıb. Bu mərhələdən 16 nəfər tələblərə uyğun hesab olunaraq kadr komissiyasına dəvət olunub.

Bütün mərhələlərin yekunu olaraq maşinist peşəsi üzrə seçilmiş 10 nəfərin nəzəri kursu başlayıb. Onlardan biri qadındır.

2018-ci ildə "Bakı metropoliteni”ndə yeni qaydalarla aparılan ilk seçim turunda bir qadın bütün mərhələləri uğurla keçərək, kursa cəlb olunmuş və o, 2019-cu il aprel ayının 1-dən metropolitendə qatar maşinisti kimi çalışan ilk qadın Günay Həbibli olub.