Türkiyə vətəndaşı "Azərlotereya"ya sədr təyin olundu

"Azərlotereya" Açıq Səhmdar Cəmiyyətinin (ASC) İdarə Heyətinə yeni sədr təyin olunub.

Türkiyə vətəndaşı olan Zafer Reisoğlu ASC-nin İdarə Heyətinin sədri olub.

Azərbaycan ərazisində bütün növ lotereyaların buraxılması, təşkili və keçirilməsi fəaliyyətini həyata keçirən "Azərlotereya" ASC 2002-ci ildə yaradılıb. ASC-nin təsisçisi İqtisadi İnkişaf Nazirliyidir. 

"Azərlotereya" ASC bu ilin yanvar ayında Azərbaycan imzaladığı Sərəncama əsasən  Türkiyənin "Demirören Şans Oyunları Yatırımları A.Ş.” şirkətinin törəmə müəssisəsi olan "YMT Sans B.V.” şirkətinə 10+5 illik müddətə idarəetməyə verilib. 

Zafer Reisoğlu bu ilin may ayına kimi Türkiyədə "Demirören Şans Oyunları Yatırımları A.Ş.” şirkətində çalışıb. Bu ilin may ayından avqust ayına kimi "Azərlotereya”nın təhvil alınması prosesinə rəhbərlik edib.