Zaqatalada fındıqçılıqla bağlı sərgi-satış yarmarkası keçirilib

Zaqatalada fındıqçılıq sahəsində istifadə olunan kənd təsərrüfatı texnika və avadanlıqlarının sərgi-satış yarmarkası keçirilib. 

Anews.az xəbər verir ki, yarmarkada nazirliyin tabeli qurumları, Aqrar Kredit və İnkişaf Agentliyi, "Aqroservis” ASC, Zaqatala Dövlət Aqrar İnkişaf Mərkəzi, Meyvəçilik və Çayçılıq Elmi-Tədqiqat İnstitutu, BMT-nin Ərzaq və Kənd Təsərrüfatı Təşkilatının (FAO) nümayəndələri, müxtəlif suvarma sistemləri, mineral gübrələr, texnika satışı ilə məşğul olan şirkətlər və fermerlər iştirak ediblər.

Sərgi-satış yarmarkasında fındıqçılıq sahəsinin inkişafı üçün lazım olan bütün texnikalar – müxtəlif ölçülü traktorlar, frezlər, gübrə və dərmansəpən aparatlar, innovativ budaq doğrayan aqreqatlar, qoşqu vasitələri və digər avadanlıqlar nümayiş olunub. 

Fermer və sahibkarlar texnika təchizatçılarının yenilikləri ilə tanış olmaq imkanı qazanıblar. Sərgilənən texnikalar öz innovativliyi ilə seçilib. Bu texnikaların ən böyük üstünlüyü çəkilərinin az olması, istismar müddətinin daha uzun olmasıdır. Sərgi-satış yarmarkasında fermerlərə maraqlı olan texnikalar, ehtiyat hissələri, qurğular üçün tələb olunan maye yağlar, qatqılar və digər zəruri avadanlıqların yerindəcə satışı da həyata keçirilib. 

Sərgidə həmçinin, yerli, xarici və qarışıq fındıq sortları nümayiş etdirilib. Bundan başqa, tədbirdə "Aqroservis” ASC ilə yanaşı, mineral gübrələrin satışı ilə məşğul olan digər təchizatçı şirkətlər də iştirak edərək, fındıqçılıqda istifadə olunan mineral gübrə və dərmanları sərgiləyiblər. Sərgi zaman gübrə üçün müraciət edən fermerlərin yaşadıqları kənd və qəsəbələrə "Aqroservis” ASC tərəfindən səyyar satış xidmətləri təşkil edilir. 


www.anews.az