Cari ildə kitabxanaya nə qədər kitab gətirilib? - AÇIQLAMA

Cari ildə kitabxanaya 12000 nüsxə ədəbiyyat daxil olub, ilin sonuna kimi bu göstəricinin artırılması nəzərdə tutulur. 2020-ci ilin göstəricisinə əsasən  isə Milli Kitabxananın fondu 4.619.345 nüsxə təşkil edib. 

Bu barədə Mədəniyyət Nazirliyinin mətbuat xidmətindən anews.az-ın sorğusuna cavab olaraq bildirib.

Ötən il ərzində Milli Kitabxananın elektron məlumat bazasına 39234 ədəd tammətnli elektron resurs daxil olub. Bunlardan 10905 resurs kitab, dövri-mətbuat və dissertasiyaları, 28329 resurs isə tammətnli analitik biblioqrafik resursları əhatə edir. Kitabxananın elektron bazasında cəmi 1.292.289 resurs yerləşdirilmişdir. Və bu göstərici daim dəyişir, kitabxananın elektron bazasına hər gün xeyli sayda elektron resurs daxil edilir. Kitabxananın əməkdaşları elektron məlumat bazaları və virtual sərgilər hazırlayır ki, həmin sərgilərdə də elektron resursu olan ədəbiyyatlar üstünlük təşkil edir.”,- deyə Mədəniyyət Nazirliyinin mətbuat xidmətindən bildirilib. 

Mədəniyyət Nazirliyi kitabxanaların iş qrafikində dəyişiklik olmayacağını da bildirib. Kitabxanalar hər gün saat 10:00-dan 20:00-dək fəaliyyət göstərəcək. Bazar ertəsi kitabxananın istirahət günüdür. Nazirlər Kabinetinin müvafiq qərarında göstərildiyi kimi oktyabr ayının 1-dən hər iki doza vaksini vurduran şəxslər qapalı məkanlara, eləcə də Milli Kitabxanaya buraxılacaq. Milli Kitabxana eyni zamanda oxucu zallarının ümumi tutumunun 50 faizindən çox olmamaqla oxucuya xidmət edə bilər və yalnız COVID-19 pasportu olan şəxslər (yaşı 18-dən aşağı olan şəxslər istisna olmaqla) və COVID-19-a qarşı immunitet sertifikatı ola şəxslər kitabxanadan istifadə edə bilər. 

Milli Kitabxana bir il yarımdan çox davam edən pandemiya şəraitində də oxuculara onlayn xidmət göstərib. 




www.anews.az