Azərbaycanda bu sahə üzrə kadr yoxdur - Nazirdən AÇIQLAMA

Təhsil Nazirliyində ölçmə və qiymətləndirmə sahəsi üzrə ən azı 15-20 kadra ehtiyac var.

Bunu təhsil naziri Emin Əmrullayev Prezident İlham Əliyevin "Azərbaycan gənclərinin nüfuzlu xarici ali təhsil müəssisələrində təhsil imkanlarının genişləndirilməsi haqqında” imzaladığı sərəncamla bağlı danışarkən deyib.

 

 

"Dövlət İmtahan Mərkəzi və Təhsil Nazirliyində bir neçə şəxsi çıxmaq şərti ilə testologiya və qiymətləndirmə sahəsi üzrə mütəxəssislər yoxdur. Azərbaycanda texniki biliklərə malik mütəxəssislərə ehtiyac böyükdür”,- deyə nazir çıxışında məlumat verdi.

Nazir dünyanın nüfuzlu ali təhsil müəssisəsində oxuyan şəxs iş tapmaqda çətinlik çəkməməli olduğundan da danışdı: 

 

"Məzun olandan sonra 300-dən çox yerə CV göndərsəm də, cəmi ikisi müsahibəyə çağırdı. Düşünmürəm ki, onlar məni çağırmamaqla alçaltdı  Məncə həmin vaxt üçün 298 yerdə mənə uyğun iş olmayıb. Yəni mən özüm də iş tapmaqda çətinlik çəkdiyim olub. Yeni proqramda isə ehtiyac əsasında göndərilirsə, yəqin ki, işlə təminatda da problem yaşanmayacaq. İşəgötürənin də öz maraqları olur. Nazirlikdə də kimisə işlə təmin etmək məsələsi yox, işləmək üçün müraciət edən şəxsin də öz istəkləri maraqlıdır. Düşünürəm ki, Azərbaycanda kifayət qədər iş yeri və işçiyə tələbat var”, - deyə nazir bildirdi. 

 

Nazir xaricdə təhsil alan məzunlarla bağlı layihələndirmə qrupunda koordinasiya mərkəzinin yaradılması planlaşdırıldığını da qeyd etdi. Onun sözlərinə görə, bu istiqamətdə məsləhət xidməti formatında ideya var, lakin proqram təsdiq olunduqdan sonra daha dəqiq nəsə demək mümkün olacaq.