2 600-dən çox obyektdə monitorinqlər aparılıb

Daxili İşlər Nazirliyi, Qida Təhlükəsizliyi Agentliyi və İqtisadiyyat Nazirliyi yanında Dövlət Vergi Xidmətinin nümayəndələrindən ibarət monitorinq qrupları şənlik məkanlarında tədbirlərin müəyyən edilmiş qayda və tələblərə uyğun təşkilinə nəzarət məqsədilə indiyə qədər 2 600-dən çox obyektdə monitorinq aparıb.

Dövlət Vergi Xidməti bu barədə məlumat yayıb.

Məlumata görə, aparılmış tədbirlər nəticəsində şənlik mərasimləri təşkil edilən obyektlərin xidmət personalı və qonaqlar arasında peyvənd və ya immunitet barədə müvafiq sənədlərə malik olanların sayı əvvəlki dövrlərlə müqayisədə əhəmiyyətli dərəcədə artıb, xidmət personalının vaksinləşmə göstəricisi 90%-dən çoxdur. Bununla belə, bəzi obyektlərdə qayda pozuntusu hallarına hələ də rast gəlinir. İndiyədək monitorinq aparılan tədbirlərdə iştirak edən 316 min nəfər qonağın müvafiq sənədlərinə baxılıb, 29 minədək şəxsin sənədlərində nöqsanlar aşkar edilib. Həmçinin şənlik təşkil edilən məkanların işçi heyəti arasında 1 400 nəfərə yaxın şəxsin qanunvericiliyn tələblərinə əməl etmədiyi müəyyən olunub.

Müşahidələr göstərir ki, rast gəlinən əsas pozuntu halları məkan sahiblərinin şənlik mərasimlərini icaze.e-gov.az portalında qeydə alınmadan təşkil etməsi, zalların ölçüsünün imkan vermədiyi halda daha çox qonaq üçün sifariş qəbul olunması, toylarda qonaqların sayı və masalararası məsafə ilə bağlı məhdudiyyətlərin nəzərə alınmamasıdır.

Monitorinq qruplarının məkan sahibləri ilə apardığı izahat işlərindən sonra həll oluna bilən pozuntular aradan qaldırılır və tədbirlərin qaydalara uyğun keçirilməsi təmin edilir, nümunəvi toy mərasimlərinin təşkil edildiyi məkanlarda yeni evlənənlərə hədiyyələr təqdim olunur.