Oğlu həbs edilən anaya təzyiq göstərilməsi iddiaları barədə DİN-dən AÇIQLAMA

DİN-in Mətbuat Xidmətinin Gəncə regional qrupunun baş inspektoru Eşqin Qasımov bəzi xəbər saytlarında və sosial şəbəkələrdə Şəmkir rayon sakini Səma Əliyevanın övladı Amid Əliyevin günahsız yerə həbs olunması və Səma Əliyevaya təzyiqlər göstərilməsi ilə bağlı iddiaların əsassız olduğunu bildirib:

"Məlumat üçün qeyd edim ki, vətəndaş A. Əliyev 2019-cu ilin noyabrında tanışı Nəcməddin Kamilli ilə birlikdə əvvəlcədən əlbir olaraq rayonun Yeniabad kənd sakininin evinə qanunsuz olaraq daxil olub, evdəki pul daxılından 8200 manat nağd pulu oğurlayıblar. Bundan başqa, A. Əliyev 2020-ci ilin yanvar ayında yetkinlik yaşına çatmayan tanışına əldə edəcəkləri qənimətləri bərabər şəkildə böləcəklərini vəd edərək onunla birlikdə rayonun Mahmudlu kəndində yaşayan vətəndaşa məxsus mağazaya qeyri qanuni yolla daxil olaraq oradan ümumi dəyəri 171 manat olan tütün, enerji içkisi və qida məhsullarını gizli yolla oğurlayaraq mənimsəyib. Sonucu olaraq Şəmkir rayon Polis Şöbəsinin əməkdaşlarının daxil olmuş məlumat əsasında keçirdikləri əməliyyat-axtarış tədbirləri nəticəsində A. Əliyev saxlanılaraq RPŞ-yə gətirilib və bu zaman onun üzərindən qanunsuz olaraq əldə edib saxladığı 10.025 qram narkotik vasitə olan "marixuana" aşkar edilərək götürülüb", - deyə  Eşqin Qasımov bildirib.