İş adamı ittiham olunduğu bütün maddələr üzrə bəraət alıb

Zorlamada, vergidən yayınmaqda ittiham olunan, məşhur karqo şirkətləri "Dəniz” və "Mayak"ın sahibi Saleh Ağayev barəsində məhkəmə yekun qərar verib.

İttihama əsasən, S.Ağayev 2014-2018-ci illərdə "Mayak" və "Dəniz" karqo şirkətlərinin rəhbəri kimi Çin və Türkiyədən Azərbaycana yüklərin daşınması zamanı işçiləri qanunsuz olaraq çalışdırıb. Nəzarətçi, xəzinədar, sürücü, xadimə, satıcı, fəhlə və s. kimi ümumilikdə 18 nəfəri qeyri-qanuni olaraq işlədib, onlara rəsmiləşdirmə aparmadan hər ay qanunsuz olaraq maaş verib. Bu müddətdə 82 155 manat pulu dövlət büdcəsinə ödəməkdən yayınıb.

Vergilərlə bağlı hissədə isə zərərçəkmişlərin məhkəmədə verdikləri ifadələrini təsdiq edən sübutlar müəyyən olunmayıb. Həmin şəxslərdən 11 nəfərinin S.Ağayevlə qohum olduqları, həmin şəxslərin başqa müəssisələrin işçiləri olduğu müəyyənləşib.

Təqsirli bilindiyi maddələr üzrə S.Ağayev barəsindəki heç bir ittiham sübuta yetirilmədiyi üçün Bakı Ağır Cinayətlər Məhkəməsinin hökmü ilə ona bəraət verilib və cinayət işinin icraatına xitam verilib. Hökmdən narazı qalan dövlət ittihamçısı və Bakı şəhəri Lokal Gəlirlər Baş İdarəsi apellyasiya şikayəti verib. Bakı Apellyasiya Məhkəməsi də hökmü dəyişdirmədən saxlayıb.

Bundan sonra tərəflər kassasiya şikayəti verərək sübutların yetərincə araşdırılmadığını iddia ediblər. Məhkəmə kollegiyası hesab edib ki, birinci instansiya məhkəməsi işi hərtərəfli araşdırıb, apellyasiya instansiyası birinci instansiyanın bəraət hökmünü qüvvədə saxlamaqda haqlı olub. Ali Məhkəmə də qərarı qüvvədə saxlayıb.