Şeyxdən yas çadırları ilə bağlı sərt MÖVQE

“Qurana hörmətsizlikdir”

Azərbaycanda yas çadırlarının yığışdırılması təklif edilir.

ANN.Az Trend-ə istinadən xəbər verir ki, bu təkliflə Qafqaz Müsəlmanları İdarəsində (QMİ) din xadimləri üçün keçirilən təkmilləşdirmə kursunun açılışında QMİ sədri, şeyxulislam Allahşükür Paşazadə çıxış edib.

Yas mərasimləri haqqında danışan Allahşükür Paşazadə bildirib ki, çadırların yığışdırılması üçün tez-tez təkliflər verilir:

“Biz bu barədə fikirləşirik. Düşünürük ki, molla məclisdə 2-3 saat oturmalıdır. O gəlib 2-3 saat Quran-i Kərim oxuyub, Fatihə verib getməlidir. Yoxsa əks halda insanlar Qurana hörmət etmir. Bir yandan surə oxunur, bir yandan da insanlar yeyir, içir, söhbət edirlər”.

Bu məsələnin hələ uzun illər öncədən gündəmdə olduğunu deyən QMİ sədri konkret addımlar atmağa çox az zaman qaldığını açıqlayıb.

A.Paşazadənin sözlərinə görə, yas məclisinə kimsə gedirsə, hüzr verib qayıtmalıdır. Qurana, moizəyə qulaq asmaq istəyən isə məscidə getməlidir:

“Biz din xadimləri üçün təkmilləşdirmə kursunu həyata keçirərək insanları bu sahədə maarifləndirmək, şəriət qaydaları sahəsində savadlandırmaq istəyirik. İnanıram ki, bu sahədə müsbət nəticələr əldə edəcəyik”. 

ANN.Az