Azərbaycanda tələbələr üçün 22 milyon manat vəsait ayrılacaq

Tələbə kreditinin verilməsi üçün gələn ilin dövlət büdcəsindən ayrılacaq vəsait məlum olub.

Bu məsələ "2022-ci il dövlət büdcəsi zərfi haqqında qanun layihəsində öz əksini tapıb.

Sənəddə qeyd edilib ki, əhalinin aztəminatlı təbəqəsinin ali təhsilə əlçatanlığını artırmaq və ali təhsilin əhatə dairəsini genişləndirmək məqsədilə tələbə kreditinin verilməsi üçün növbəti ilin dövlət büdcəsindən 22 milyon manat vəsaitin ayrılması nəzərdə tutulur.

 

Azərbaycanda 2021/2022-ci tədris ilindən peşə təhsili müəssisələrinə dövlət hesabına tələbə qəbulu sayının 1 880 nəfər artırılması nəzərdə tutulub. Bundan başqa, sənədə əsasən, həmin müəssisələrdə təqaüdlərin tələbələrin müvəffəqiyyət göstəricilərindən asılı olaraq yeni qaydada ödənilməsi planlaşdırılır.

 

Azərbaycanda gələn il təhsil üçün dövlət büdcəsindən 3,884 milyard manat xərclənəcək. Sənədə əsasən, bu, gələnilki büdcə xərclərinin 13%-i deməkdir, 2021-ci ilin təsdiq olunmuş göstəricisi ilə müqayisədə 18,5% çoxdur.