Bakıda narkotiklə tutulan şəxsə 20 il iş verildi

Bakı Ağır Cinayətlər Məhkəməsində külli miqdarda narkotik vasitə əldə etmə və qaçaqmalçılıqda təqsirləndirilən Qadir Baladadaşov və Səbuhi Həsənovun cinayət işi üzrə məhkəmə iclası başa çatıb.

Hakim Səbuhi Hüseynovun sədrliyi ilə keçirilən prosesdə hökm oxunub.

Məhkəmənin hökmü Q.Baladadaşov 20 il və S.Həsənov isə 19 il müddətinə azadlıqdan məhrum edilib.

Bu ilin əvvəlində Daxili İşlər Nazirliyinin Baş Narkotiklərlə Mübarizə İdarəsinin əməkdaşları tərəfindən keçirilən tədbir nəticəsində narkotik vasitələrin qanunsuz dövriyyəsində şübhəli bilinən vətəndaş Q.Baladadaşov saxlanılıb.

Onun Binəqədi rayonunda yaşadığı evə baxış zamanı ümumi çəkisi 80 kq-dan artıq narkotik vasitə və psixotrop maddə, o cümlədən 55 kq heroin, 2 kq 700 qram tiryək, 10 kq marixuana, 13 kq psixotrop maddə olan metamfetamin, 500 ədəd narkotik tərkibli satışı qadağan edilən metadon həbləri və 1 ədəd elektron tərəzi götürülüb.

Araşdırma zamanı müəyyən olunub ki, Q.Baladadaşov şəxsiyyəti istintaqa məlum olmayan xarici ölkələrdən birinin vətəndaşı ilə sosial şəbəkələrdə əlaqə yaradaraq külli miqdarda narkotik vasitənin Azərbaycan ərazisinə gətirilməsinə köməklik edib. Daha sonra o, icarəyə götürdüyü avtomobillə narkotik vasitələri Masallı-Yardımlı yolunun kənarında gizlədilən yerdən götürərək Bakı şəhərinə gətirib.