Kirayədə qalan deputatların adı məlum oldu

Milli Məclisin ötən gün keçirilən iclasında deputat Razi Nurullayevin evsiz deputatların kirayə haqlarının qaldırılması ilə bağlı təklifi sosial şəbəkələrdə müzakirələrə səbəb olub. Vətəndaşların çoxu deputatların şəxsi mənzillərinin olmaması və kirayədə qalması məsələsinə təəccüblənib, hətta buna inanmadığını dilə gətirənlər də var. R. Nurullayev sözügedən çıxışında hazırda evsiz həmkarlarına verilən 220 manat kirayə haqqının artırılmasını təklif edib. 

"Qafqazinfo” kirayədə qalan deputatların bir neçəsinin adlarını öyrənə bilib. Söhbət həmin millət vəkillərinin Bakı şəhərində kirayə qalmasından gedir. Hazırda parlamentin tərkibində müxtəlif rayonları təmsil edən 12-yə yaxın deputat Bakıda kirayə mənzillərdə qaldığına görə aylıq 220 manat kirayə pulu alır. 

Həmin deputatlar Cavid Osmanov, Vüqar İskəndərov,  Cəbi Quliyev, Ülviyyə Həmzəyeva, Müşfiq Cəfərov, Pərvin Kazımzadə, Naqif Həmzəyev və digərləridir.

Bakıda mənzili olmayan deputatlara kirayə pulunun verilməsi məsələsinə 2000-ci ilin əvvəllərindən başlanılıb. 2006-cı ildən etibarən bu məbləğ 220 manat həcmində qəbul edilib. Son 15 il ərzində bu rəqəm dəyişməyərək olduğu kimi qalıb. 

2015-ci ildən etibarən deputatları evlə təmin etmək üçün bina tikintisi dayandırılıb və o dövrdən etibarən heç kimə ev verilmir. Əvvəlki dövrlərdə isə Bakı Şəhər İcra Hakimiyyəti tərəfindən bəzi deputatlar Bakıda xidməti evlə təmin olunub. 

"Mən məsuliyyəti üzərimə ona görə götürüb dedim ki, cəmiyyətdə deputatlara qarşı oturuşmuş fikir var ki, onların heç nəyə ehtiyacı yoxdur. Deyirlər ki, deputat 6000 manat maaş alır. Əslində isə 1700 manat civarında maaş alırıq. Ezamiyyətlər filan olduqda, maaşda dəyişiklik olur. Həmin mövzu da elə-belə qaldırılmadı. Çünki parlamentin büdcəsi müzakirə olunurdu. Bilirsiniz ki, 220 manatla Bakıda kirayədə qalmaq mümkün deyil. Həmin deputatlara pul verilsin məqsədilə bunu demədim. Cəmiyyət bilsin ki, Bakıda evi olmayan deputat da var. Bu, o demək deyil ki, vəzifəli şəxslərin hamısı yağ-bal içində yaşayır. Bəziləri yazıb özünü vətənpərvər göstərmək istəyir. Ancaq onların özünün bu günə kimi cəmiyyətə bir qəpiklik xeyirləri olmayıb. Ancaq danışmağı və tələb etməyi bilirlər. Qoy tələbi haqqı çatan xalq etsin”. 

R. Nurullayev qeyd edib ki, deputatın özünün müəyyən büdcəsi olsa, seçicilərinin məsələlərini daha tez həll edə bilər: "Mən özüm indi İmişliyə gedirəm. Özümlə köməkçimi də aparıram. İki gün orada qalacam. Bilirsiniz ki, insanların deputatdan gözləntisi böyükdür. Bir deputat ayda iki-üç dəfə rayona seçiciləri ilə görüşməyə getsə, onun maaşının yarısı buna gedəcək. Buna görə də çox deputat tez-tez gedib gələ bilmir.