Deputat yas mərasimlərinə icazə verilməsini TƏKLİF ETDİ

Yas mərasimlərinə də 100-150 nəfərlə keçirilməsinə icazə verilsin.

 

Anews.az xəbər verir ki, bunu Milli Məclisin bu gün keçirilən iclasında deputat Razı Nurullayev bildirib.

 

"Bu gün Azərbaycanda 150 nəfərlik toyların keçirilməsinə icazə verilir. Operativ Qərargah və müvafiq dövlət orqanları COVID virusunu nəzarət altında saxlaya bilir. Digər tərəfdən, insanlar özləri də məsuliyyətli olub və qorunur. Yası düşən adam həyətində başsağlığı qəbul etmək üçün incidilməsin. Elə rayonlar var ki, qaydaları bir az yumşaq tətbiq edir, elə rayon və şəhərlər də var ki, daha sərt. Nə fərqi var ki, məclis məclisdir. Operativ Qərargahdan bu məsələyə operativ baxmağı xahiş edirəm. Belə çıxmasın ki, insanlar toyda yoluxmur, yasda yoluxur. Onsuz da qadınlar evlərdə yığışıb yas edirlər və bunun qarşısını almaq mümkün deyil. Kişilər isə qayda-qanunlara daha uyğun hərəkət edə və məsafə saxlaya bilər. İkinci məsələ isə dini inancları olan şəxslərlə bağlıdır. Məscidlərdə 50 nəfərin sayının toy sayına bərabərləşdirilməsi, ən azı 100 nəfərə çatdırılması ədalətli olardı. Eyni zamanda, eyni vaxtda namaz qılanların da sayının 15 nəfər müəyyən edilməsi sosial narazılıq yaradıb. Din adamları gündə üç dəfə dəstəmaz alır və təmizliyə daha çox riayət edirlər. Ümid edirəm ki, bu məsələ ilə bağlı izahat və açıqlamanı da bu gün, ya sabah eşidərik. Arzum budur ki, aidiyyəti orqanlar deputatların qaldırdıqları məsələlərə mütləq münasibət bildirsinlər. Bir-birimizlə qarşılıqlı anlaşma və hörmət mühitində işləyək ki, münasibətlərimiz gərginləşməsin", deyə deputat qeyd edib.

 

Gülnar Nazimqızı