Azərbaycanla İran arasında yeni körpü belə görünəcək - FOTOLAR

Azərbaycan və İran İslam Respublikası arasında "Astaraçay" çayı üzərində tikilən yeni avtomobil körpüsünün necə görünəcəyi məlum olub.

Anews.az-ın məlumatına görə körpü üç aşırımlı, iki ara dayağı olacaq. Körpünün özü hər istiqamətdə iki olmaqla dörd zolaqlı olacaq. İki piyada yolu yolun hərəkət hissəsindən beton bordürlərlə ayrılacaq, ortada ayırıcı səd də betondan hazırlanacaq.

Körpünün eni 30 metr 60 santimetr, ümumi uzunluğu 100 metrə yaxın olacaq.

Körpünün təməlqoyma mərasimi yanvarın 25-də İranın yol və şəhərsalma naziri Rüstəm Qaseminin və Azərbaycanın baş nazirinin müavini Şahin Mustafayevin iştirakı ilə baş tutub.

Astaraçayı üzərindəki körpü İran və Azərbaycanın vəsaiti hesabına tikiləcək. Onun açılması iki ölkə arasında və Rusiyaya tranzitin artmasına səbəb olacaq. Körpünün və onun ətrafındakı yolların tikintisinin bir il ərzində başa çatdırılması nəzərdə tutulur.



www.anews.az