Azərbaycanda 33 şagird bu səbəbdən məktəbə getməkdən imtina etdi -Araşdırma aparılır

Sumqayıt Təfəkkür litseyinin 3 c sinif şagirdləri məktəbə gəlməkdən imtina edib. 

 

Anews.az Baku TV-yə istinadla xəbər verir ki, artıq 3 gündür bir sinifin 33 şagirdi dərsə gəlmir.

Baku TV-yə müraciət edən valideynlər bildirib ki, onlar sinifin müəllimi Səbinə Şahbazovanı istəmirlər. Valideynlər tez-tez dərsdən qalan müəllimin şagirdlərinə dərs deməsini məqbul hesab etmirlər və məhz buna görə də uşaqları məktəbə qoymurlar.

Məsələyə münasibət bildirən litseyin direktoru bildirib ki, sinifin müəllimi analıq məzuniyyətinə çıxıb və artıq fevralın 1-dən analıq məzuniyyəti bitdiyinə görə işə çıxır: "Qanun müəllimənin öz yerinə qayıtmasını tələb edir. Biz də qanuna uyğun olaraq onun iş yerini bərpa etmişik. Tədris ilinin əvvəlindən başqa bir məktəbdən müddətli müqavilə ilə bir müəllim dəvət edilmişdi. Bu barədə Təhsil şöbəsinin də məlumatı var. Hazırda valideynlərlə danışıq aparılır. İnanıram ki, biz valideynlərlə bir-birimizi başa düşəcəyik".