Xırdalan sakinləri dünəndən işıqsız qalıb

Dünən saat 21:00-dan etibarən Abşeron rayonu Xırdalan şəhərinin böyük bir hissəsində elektrik enerjisinin verilişi dayandırılıb.Bu barədə APA-ya 28-ci məhəllənin sakinləri məlumat verib. Məlumata görə, dünən təkcə binaların deyil, Xırdalanın mərkəzi küçələrinin də işıqları söndürülüb. Dünəndən kəsilən elektrik enerjisinin təchizatı hələ də (saat 13:00) bərpa olunmayıb. Sumqayıt Regional Elektrik Şəbəkəsinin Xırdalan Elektrik Şəbəkəsinin baş mühəndisi İbiş Mehdiyev “APA-Economics”ə bildirib ki, yaşayış massivində elektrik enerjisinin verilməsində məhdudiyyətin yaranmasına səbəb dünən axşam saatlarında ərazidən keçən su borusunun partlaması olub: “Biz də bu səbəbdən işığı kəsmək məcburiyyətində qalmışıq. Artıq su borusunun partlayan hissəsi aşkarlanıb və muftalanma işləri aparılır”. İ.Mehdiyev bildirib ki, yaxın 1 saat ərzində ərazidə elektrik enerjisinin verilişi bərpa ediləcək.ANN.Az