Oğuzda 100-ə yaxın ağac kəsilib

Oğuzun Çaldaş kəndi ərazisində qiymətli ağaclar kəsilib. Hazırda ərazidə saqqız ağacları, nadir şam nümunələri də daxil olmaqla 100-ə qədər ağac kəsilib, bu barədə Çaldaş kənd sakinləri məlumat veriblər.

Onların sözlərinə görə, örüş sahəsi yaxınlığında Türyançay Dövlət Təbiət Qoruğu ərazisində qiymətli ağaclar da daxil olmaqla 100-ə qədər ağacların kəsildiyinin şahidi olublar. Sakinlər təbiətə vurulan bu ziyanın qarşısının alınmasını istəyirlər.

Çaldaş kəndinin daxil olduğu Böyük Söyüdlü bələdiyyəsindən bildirilib ki, sözü gedən ağacların kəsildiyi ərazi kənd ərazisi deyil.

 

Türyançay Dövlət Təbiət Qoruğundan isə bildirilib ki, ağacların kəsildiyi əraziyə baxış keçirilib.

"Biz ağacların kəsildiyi meşə ərazisinə baxış keçirdik və müəyyən etdik ki, həmin ərazi Türyançay qoruğuna daxil olmayan meşə ərazisidir",- deyə məlumat verilib.

Ekologiya və Təbii Sərvətlər Nazirliyindən  bildirilib ki, artıq araşdırmalara başlanılıb.

 

"Faktla əlaqədar komissiya təşkil olunaraq ərazidə araşdırılmalar aparılır. Araşdırmaların nəticəsindən sonra ağacların hansı əraziyə aid olduğu müəyyənləşdirildikdən sonra müvafiq tədbirlər görüləcək",- nazirlik deyib.(report.az)