Vətəndaşlar notarial xidmətləri online həyata keçirə biləcək

09.02.2022 14:43

Ədliyyə nazirliyi ilə Paşa Bankın birgə əməkdaşlığı çərçivəsində vətəndaşların işini bir az da asanlaşdırmaq məqsədi ilə "mobil norariat” tətbiqi sadə vətəndaşların istifadəsinə verilib. Onlayn Bank platformasına inteqrasiya olunmuş yeni sistemin dəstəyi ilə müştəri elektron kabinetindən ərizəsini videoyazı ilə birgə notariusa göndərərək notariat qaydasında təsdiqlədə biləcəkdir.

Ədliyyə Nazirliyi İnformasiya-kommunikasiya texnologiyaları idarəsinin rəisi Ağakərim Səmədzadə bu gün keçirilən mətbuat konfransında bildirib ki, bu tətbiq uğurlu olarsa gələcəkdə digər banklarla da əməkdaşlıq qurulacaq.

"Nəticədən asılı olaraq, başqa banklarla da bənzər əməkdaşlığın yaradılması gələcəkdə düşünülə bilər. Hazırda notarial mobil tətbiq vasitəsilə 12 növ müxtəlif notarial xidmətlərin rəsmiləşdirilməsi həyata keçirilir. Bu istiqamətdə görülən tədbirlər çərçivəsində ölkədə iqtisadi proseslərin tənzimlənməsində əhəmiyyətli rolu olan PAŞA Bankın onlayn bank platforması ilə "Mobil notariat” tətbiqinin inteqrasiyası həm məsafədən təqdim olunan bank məhsullarının dairəsinin xeyli genişləndirilməsinə, həm də bu əməliyyatların etibarlığının artırılmasına xidmət edəcək”, - deyə nazirlik rəsmisi bildirib.

"PAŞA Bank”ın Texnologiya blokunun baş direktoru Vüsal Xəlilov anews.az-a açıqlamasında bildirib ki, bu tətbiq vasitəsilə bank həm müştərilərinə yeni xidmət təqdim etmiş olacaq, həm də özləri üçün yeni müştəri qazanacaq.

"Bu texnoloji həll ilkin mərhələdə müştərilərlə imzalanmış Ümumi Şərtlər Toplusuna zəruri əlavə və düzəlişlərin edilməsi üçün tətbiq olunacaq. Bu yenilik bank-müştəri arasında sənədləşmə işlərinin daha etibarlı və əlavə vaxt itkisi olmadan həyata keçirilməsini təmin edəcək. Bundan başqa bank əməliyyatına sərf olunan vaxta maksimum qənaət edilməsi "PAŞA Bank”ın əsas prioriteti olduğunu nəzərə alaraq bu xidmətin vətəndaşlar üçün də yaxşı olacağını düşünürük. Bu cür texnoloji həllərin tətbiqi isə təkcə müştərinin deyil, həm də dövlət və özəl sektor arasında təşkil edilən birgə xidmətlərin dairəsinin genişləndirilməsinə imkan verəcək”, - deyə Xəlilov bildirib.

Mobil notariat tətbiqi 2019-cü ildən istifadəyə verilib və bu sistemdən bir çox dövlət qurumları istifadə edə bilirdi. Tətbiqin ümümumilikdə 200 min istifadəçisi var.