ABŞ Səfirliyi "Media haqqında" yeni qanun layihəsindən narahatdır

ABŞ Səfirliyi Azərbaycan hökumətini "Media haqqında" yeni qanunu ATƏT standartlarına və öz beynəlxalq öhdəliklərinə uyğun şəkildə tətbiq etməyə çağırıb. 

Bu barədə səfirliyin "Turan" agentliyinin Prezident Əliyevin  imzaladığı "Media haqqında" qanuna ABŞ səfirliyinin münasibəti ilə bağlı sorğusuna cavabında deyilir.

ABŞ səfirliyinin rəsmi nümayəndəsinin cavabında deyilir:

"Biz media haqqında yeni qanunun müstəqil jurnalistlərin, KİV sahəsində ekspertlərin və beynəlxalq təşkilatların, o cümlədən ATƏT və Avropa Şurasının fikri nəzərə alınmadan qəbul edilməsindən və imzalanmasından narahatıq.

Hökuməti yeni qanunu ATƏT və digər beynəlxalq təşkilatlar çərçivəsində öhdəliklərinə uyğun şəkildə tətbiq etməyə çağırırıq", - deyə bildirilib.

Fevralın 8-də Azərbaycan prezidenti İlham Əliyev ölkə parlamentinin ötən il dekabrın 30-da qəbul etdiyi "Media haqqında" qanunu imzalayıb. Dövlət başçısı qanunun tətbiqi və ondan irəli gələn bir sıra məsələlərin tənzimlənməsi haqqında fərman da imzalayıb.