Naməlum avtomobil 47 yaşlı kişini vuraraq öldürüb

 

Bu barədə Baş Prokurorluğun Mətbuat Xidmətindən bildirilib.

 

Rayonun Böyük Əmilli kənd sakini, 1975-ci il təvəllüdlü Salahov Bəxtiyar Tacir oğlunun qeyri aşkar şəraitdə sağ ayağının baldır sümüklərinin açıq sınığı xəsarətlərini alması və göstərilən tibbi yardıma baxmayaraq Qəbələ Rayon Diaqnostika Mərkəzində 25 dekabr 2022-ci il tarixdə vəfat etməsi faktına görə rayon prokurorluğu tərəfindən Cinayət Məcəlləsinin 263.2-ci maddəsi (ehtiyatsızlıqdan zərərçəkmiş şəxsin ölümünə səbəb olmuş nəqliyyat vasitəsini idarə edən şəxs tərəfindən yol hərəkəti və nəqliyyat vasitələrinin istismarı qaydaları pozma) ilə cinayət işi başlanılaraq istintaq aparılıb.

 

Daha sonra cinayət işi Qəbələ Rayon Polis Şöbəsinin İstintaq bölməsinə göndərilib.

 

Hazırda cinayət hadisəsinin hansı şəraitdə baş verməsinin müəyyən edilməsi istiqamətində zəruri istintaq və əməliyyat tədbirləri davam etdirilir.