Azərbaycanda 8,8 milyon manat mənimsəyən şirkət rəhbəri həbs edildi

Türk iş adamı Şahan Mehmet qanunsuz olaraq 8,8 milyon manat mənimsədiyinə görə həbs edildi, bu barədə Baş Prokurorluğun fevralın 18-də yaydığı açıqlamada deyilir. 

Məlumata görə, "THALES INTERNATIONAL WESTERN COUNTRIES B.V.” transmilli korporasiyasının Azərbaycandakı Nümayəndəliyinin direktoru vəzifəsində işləmiş Şahan Mehmet Mehmetali oğlu vəzifə səlahiyyətlərini aşıb.

Prokurorluq bildirir ki, Şahan Mehmetin 2014-2021-ci illər ərzində vəzifə səlahiyyətlərindən sui-istifadə edərək nümayəndəliyin fəaliyyətindən irəli gələn zəruri xərclərin qarşılanması məqsədilə həmin Şirkətin mərkəzi ofisi tərəfindən ayrılmış ümumilikdə 8 milyon 860 min manat məbləğində pul vəsaitini rəhbərlik etdiyi qurumun müvafiq bank hesabından nağd və eləcə də başqa şirkətlərə xidmətlərin göstərilməsi adı altında köçürülərək nağdlaşdırılması yolu ilə mənimsəməsinə, habelə həmin məqsədlə rəsmi sənədlərə bilə-bilə yalan məlumatları daxil edərək vəzifə saxtakarlığı törətməsinə əsaslı şübhələr yaranıb.