Bakıda tikilməkdə olan bina çöküb - YENİLƏNİR

Bakıda binanın çökməsi ilə bağlı məhkəmə-tibbi ekspertizaları təyin edilib, bu barədə Baş Prokurorluğun Mətbuat Xidmətindən məlumat verilib.

Bildirilib ki, paytaxtın Nərimanov rayonunun Keşlə qəsəbəsində "City Garden" layihəsi çərçivəsində söküntü işlərinin aparılması zamanı şirkətdə əmək müqaviləsi əsasında işləyən və həmin işlərə cəlb edilmiş yalnız 4 nəfər şəxsin müxtəlif dərəcəli bədən xəsarətləri almaları müəyyən edilib.

Hər birinə ambulator tibbi yardım göstərildikdən sonra sonuncular evə buraxılıblar.

Faktla bağlı Baş Prokurorluğun İstintaq idarəsi tərəfindən araşdırma aparılır, hadisə yerinə baxış keçirilib və qeyd edilən şəxslərin aldıqları xəsarətlərin dərəcəsini müəyyən etmək məqsədilə məhkəmə-tibbi ekspertizaları təyin edilib.

İctimaiyyətə əlavə məlumat veriləcəkdir.

*****

Fövqəladə Hallar Nazirliyi (FHN) Bakıda binanın çökməsi nəticəsində xəsarət alanların sayını açıqlayıb.

FHN-in əməkdaşı Bəxtiyar Tağıyev bildirib ki, hadisənin baş verdiyi ərazidə "City Garden" şirkəti tərəfindən binanın tikintisi aparılır.

"Tikinti gedən prosesdə binanın ikinci mərtəbəsində beton verilən zaman qəlibləmələrdə boşluqların olduğu hiss olunub. Bu zaman qəlib qaçıb və uçqun baş verib. Bildirilir ki, 3 nəfər yüngül xəsarət alıb və onlar xəstəxanaya yerləşdiriliblər. Hazırda əraziyə Fövqəladə Hallar Nazirliyinin əməkdaşları cəlb olunub. Şirkətin nümayəndələri ilə dəqiqləşdirmə aparırıq. Məlumata görə, dağıntılar altında qalan yoxdur. Şirkət əməkdaşları say tərkibi ilə yoxlanılıb, 3 nəfərdən başqa digərləri sağ-salamatdır. Bu ərazidə yaşayış kompleksinin tikintisi ilə əlaqədar inzibati binanın tikintisi də aparılırdı. Bir sözlə, yaşayış binası deyildi", - o vurğulayıb.

 

******

Bakıda tikilməkdə olan bina çöküb, 4 nəfər xəsarət alıb, bu barədə Baş Prokurorluğun Mətbuat Xidmətindən məlumat verilib. 

Bildirilib ki, paytaxtın Nərimanov rayonunun Keşlə qəsəbəsində "City Garden" şirkətinin tikilməkdə olan binalarının birinin çökməsi barədə məlumat daxil olub.

Faktla bağlı Baş Prokurorluğun İstintaq idarəsinin əməkdaşları tərəfindən hazırda hadisə yerinin müayinəsi həyata keçirilir.

İlkin məlumata görə, hadisə zamanı bir neçə şəxs xəsarət alıb.

Yaxın zamanda ictimaiyyətə əlavə məlumat veriləcəkdir.