Niyaməddin Əhmədovun şikayəti TƏMİN EDİLMƏDİ

İkinci instansiya məhkəməsi Niyaməddin Əhmədov barədə13 illik həbs hökmü qüvvədə saxlayıb.

 

Vəkillər apellyasiya instansiyasının qərarından Ali Məhkəməyə kassasiya şikayəti verəcəklərini bildirib.

Niyaməddin Əhmədov 2020-ci ilin aprelindən həbsdədir. Əvvəlcə, Əhmədov karantin rejimi qaydalarını pozma ittihamıyla bir ay inzibati həbsdə saxlanıb.

 

Bu cəza başa çatdığı gün isə terroru maliyyələşdirmə maddəsi ilə barəsində yeni iş başlanıb.

 

İstintaqın sonunda ona daha iki maddə ilə - 28.281 (dövlət əleyhinə yönəlik açıq çağırışlara hazırlıq) 233-1 (qanunla mülki dövriyyədə olmasına yol verilməyən əşyaları əldə etmə, saxlama) maddələri ilə ittiham verilib. İddia olunur ki, Almaniyada siyasi mühacir kimi yaşayan və sosial şəbəkələrdə Azərbaycan hakimiyyətinin ünvanına tənqidlər, bəzən də təhqirlər səsləndirən Qabil Məmmədov terror məqsədilə ona pul göndərib.

 

Oktyabrın 8-də Bakı Ağır Cinayətlər Məhkəməsi Niyaməddin Əhmədovu 13 il azadlıqdan məhrum edib. Niyaməddin Əhmədov Cinayət Məcəlləsinin 214-1 (terroru maliyyələşdirmə), 28.281 (dövlət əleyhinə yönəlik açıq çağırışlara hazırlıq) və 233-1 (qanunla mülki dövriyyədə olmasına yol verilməyən əşyaları əldə etmə, saxlama) maddələri ilə təqsirli bilinib.

 

Dövlət Təhlükəsizliyi Xidməti və Baş Prokurorluğun birgə açıqlamasına əsasən, Almaniyada sığınacaq almış Azərbaycan vətəndaşı Habil Məmmədov terror aktlarının hazırlanması məqsədilə Niyaməddin Əhmədova pul göndərib.

Ləman Qasımova