Jurnalistin qətlinin 17-ci ili

"Monitor” jurnalının baş redaktoru Elmar Hüseynov 2005-ci il martın 2-də evinin astanasında odlu silahla qətlə yetirilib. Jurnalistə tapançadan 7 atəş açılıb. İstintaq orqanı jurnalisti Gürcüstan vətəndaşları olan azərbaycanlılar Teymuraz Əliyev və Tahir Xubanovun qətlə yetirdiyini bildirib.

2006-cı il avqustun 14-də cinayətkar qrupa başçılıq etmiş Azərbaycan Daxili İşlər Nazirliyinin Cinayət-Axtarış İdarəsinin keçmiş əməkdaşı Hacı Məmmədov Ağır Cinayətlərə dair İşlər üzrə Məhkəmədə Elmar Hüseynovun sabiq iqtisadi inkişaf naziri Fərhad Əliyevin sifarişi ilə onun dəstəsinin öldürdüyünü bildirib. Lakin Hacı Məmmədovun dedikləri istintaqda təsdiqini tapmayıb.

Jurnalistin qətlindən 15 il keçsə də qətlin icraçıları hələ də istintaqa təhvil verilməyib, qətlin sifarişçiləri ilə bağlı isə hər hansı rəsmi açıqlama olmayıb. Məsələ ilə bağlı yenidən Baş Prokurorluq ilə əlaqə saxlamağa çalışsaq da, zənglərimizə cavab verilmədi.

 

Hüseynov Azərbaycan hakimiyyətinin yüksək vəzifəli şəxslərini tənqidi məqalələri ilə tanınıb. Redaktoru olduğu "Monitor” jurnalında korrupsiya, qohumbazlıq, yerlibazlıq, hakimiyyətdaxili münasibətlərlə bağlı dərc edilən məqalələr geniş müzakirələrə səbəb olub.

Jurnalistin qətli yerli və beynəlxalq ictimaiyyət tərəfindən kəskin tənqidlərə yol açıb. Ölümünün ilk illərində Azərbaycanın istintaq orqanları Türkiyədən və Amerikadan mütəxəssislər dəvət edib. Prezident İlham Əliyev jurnalistin atasını qəbul edib, qətlin icraçılarının və sifarişçilərinin tezliklə tapılacağını bildirib. İlk illərdə intensiv istintaq tədbirləri həyata keçirilsə də, sonradan bu hərəkətlər zəifləyib.

 

2017-ci ilin aprelində Avropa İnsan Hüquqları Məhkəməsi (AİHM) Hüseynovun qətlinin Azərbaycanda effektiv araşdırılmaması barədə qərar verib. Bununla bağlı AİHM-a mərhum jurnalistin həyat yoldaşı Ruşaniyyə Hüseynova şikayət edib.

Qərarda qeyd edilir ki, hökumət Elmar Hüseynovun qətlə yetirilməsi olayı üzrə açılan cinayət işini effektiv aparmayıb. Qərara əsasən, Azərbaycan hökuməti mənəvi zərərə görə 20 min, hüquqi məsrəflərinə görə 10 min avro cərimələnib.

Elmar Hüseynov 17 iyul 1967-ci ildə anadan olub. O, 1995-ci ildən etibarən jurnalist fəaliyyətinə başlayıb. Həmin ildə "Trend” analitik-informasiya agentliyini, 1996-cı ildə "Monitor” jurnalını təsis edib. Hüseynov həmçinin "Bakinski bulvar”, "Bakinskiye vedomosti” qəzetlərinin təsisçisi idi.