Bakalavriat və magistratura səviyyəsi üzrə ayrılan plan yerlərinin sayı açıqlandı

“Azərbaycanda magistraturanın plan yerləri ötən illə müqayisədə 5% azalıb. Bu il magistraturaya qəbul planı 6565 yerdir”.APA-nın xəbərinə görə, bunu Tələbə Qəbulu üzrə Dövlət Komissiyasının (TQDK) sədri Məleykə Abbaszadə keçirdiyi mətbuat konfransında deyib. O bildirib ki, magistraturaya qəbul planının azalmasında narahatedici heç nə yoxdur. TQDK sədrinin sözlərinə görə, keçən il magistraturaya qəbul planı 6964 idisə, ora cəmi 5500 nəfər qəbul olunmuşdu: “Həmin plan yerinə yetirilməyib və yerlərin bir qismi boş qalıb Bu il isə magistratura səviyyəsi üzrə 38 universitet üçün 6565 plan yeri ayrılıb. Əsas yenilik odur ki, növbəti tədris ili üçün magistratura səviyyəsində qiyabi təhsil forması üzrə plan yerləri ayrılmayıb. Azərbaycan Dövlət İqtisad Universiteti, Azərbaycan Dillər Universitetində plan yerlərinin sayı azalıb. Bəzi universitetlərdə isə plan yerlərinin sayında cüzi artım (3%) qeydə alınıb. Bu məlumatlar “Magistr” jurnalının 4-cü sayında yerləşdirilib”.M.Abbaszadə əlavə edib ki, 2014-2015-ci tədris ili üçün Azərbaycanın ali təhsil müəssisələrinə bakalavriat səviyyəsi üzrə 38 111 plan yeri ayrılıb. Növbəti tədris ili üçün ali məktəblərə qəbul planının 3,95 %, yaxud 1449 yer artdığını deyən TQDK sədri qeyd edib ki, müxtəlif hərbi və xüsusi təyinatlı məktəblər istisna edilsə, I qrupda plan yerlərinin sayında artım təxminən 4%, II qrupda təxminən 7%, III qrupda artım 0,5%, IV qrupda artım 0,8%-dir. Onun sözlərinə görə, qəbul planında dövlət sifarişli ixtisaslar üzrə plan yerlərinin sayı 1,26% artıb: “Bu il I ixtisas qrupunda dövlət sifarişli ixtisaslar üzrə plan yerlərinin sayı 7% artıb, II qrupda 35% azalıb, III qrupda 7% artıb, IV qrupda təxminən 8% artıb. Əsas müsabiqə vəziyyəti dövlət sifarişli yerlər üzrə olur. Yeni tədris ili üçün ali məktəblərə qəbul planı tərtib edilərkən Təhsil Nazirliyinin razılığı və universitetlərin xahişi ilə müəyyən ixtisaslarda rus və Azərbaycan bölməsi üzrə plan yerləri ayrı verilib. Buna görə də həmin ixtisaslarda rus və Azərbaycan bölməsi üzrə müsabiqə ayrı-ayrılıqda aparılacaq. Keçən il isə əksər ixtisaslarda müsabiqə birgə aparılırdı. Müsabiqə birgə aparıldıqda, onlar üçün qrupların formalaşdırılması çətin olur. Ona görə də bu il qəbul planında müəyyən ixtisaslarda müsabiqə birgə aparılacaq. Ancaq müəyyən universitetlər bununla razılaşmayaraq plan yerlərini rus və Azərbaycan bölmələri üzrə birgə veriblər”. ANN.Az