İlham Mirzəyev “Space”dən kənarlaşdırıldı

Aprelin 12-də Nərimanov rayon məhkəməsinin qərarı ilə 2 aylıq müddətində həbs edilən “Space” TV-nin tanınmış aparıcısı İlham Mirzəyev rəhbərliyin qərarı ilə işdən kənarlaşdırılıb.

Aktual.az-ın əldə etdiyi məlumata görə, teleaparıcının həbsi ilə əlaqədar onun aparıcısı olduğu “Etibar edin” verilişi bağlandıqdan bir müddət sonra rəhbərlik İlham Mirzəyevi işdən azad etmək qərarına gəlib. Buna səbəb teleaprıcının həbsi ətrafında yaranan məsələ olub.

Məlumata görə, mətbuatın ölkədə cərəyan edən siyasi proseslərdə İlham Mirzəyev izi axtarması telekanal rəhbərliyini təşvişə salıb və əlavə problemdən qurtulmaq üçün bu qərara gəlinib.

Məsələ ilə əlaqədar Aktual.az-a açıqlamasında “Space” telekanalının icraçı direktoru Kamil Şahverdiyev məzuniyyətdə olduğunu əsas gətirərək yayılan məlumata şərh verməkdən imtina etdi: “İndi bu haqda əlavə şərh verə bilməyəcəm. Birinci gün işə çıxdıqdan sonra sizin suala cavab verə bilərəm”.

Xatırladaq ki, İlham Mirzəyevin saxlanmasına səbəb vətəndaşların baxıcı tərəfindən aldadılması ilə bağlı çoxsaylı müraciətləri olub. Teleaparıcıya Cinayət Məcəlləsinin 178-ci maddəsi ilə cinayət işi açılıb və o, iki aylıq müddətində həbs edilib.

ANN.Az