Məhkəmə “Tik-Tok”er qızı öldürən şəxslə bağlı qərar elan edib

Şəki Apellyasiya Məhkəməsi Göyçayda bacısı qızını boğaraq öldürməkdə təqsirləndirilən Vüqar Bədəlovun barəsində olan hökmdən verilən apellyasiya şikayəti üzrə qərar elan edib.

Hakim İmanverdi Şükürovun sədrliyi ilə keçirilən prosesdə təqsirləndirilən şəxsin apellyasiya şikayəti təmin olunmayıb.

Birinci instansiya məhkəməsinin çıxardığı hökm dəyişdirilmədən saxlanılıb.

Hadisə 2021-ci il mayın 9-u saat 06 radələrində Göyçay rayonu, Bığır kəndi ərazisində qeydə alınıb.

Kənd sakini, 2002-ci il təvəllüdlü Fatimə Məmmədova dayısı Vüqar Bədəlov tərəfindən yastıqla boğularaq qətlə yetirilib.

İttihama görə, dayı bacısı qızını namus üstə öldürüb. Belə ki, Fatimə Məmmədova nişanlı olub. Lakin o, sonradan nişanlı ola-ola evdən qaçıb və yenidən evə qayıdıb.

Hadisə günü Fatimə Məmmədova evdə ayrı-ayrı şəxslərlə uca səslə telefonla danışıb. Vüqar Bədəlov da qadının bu hərəkətlərinə irad bildirib. Bacısı qızı isə onu nalayiq ifadələrlə təhqir edib və dayısına əhəmiyyət vermədən yenidən telefonla danışmağa başlayıb.

Daha sonra Bədəlov Məmmədova yatan zaman onu yastıqla boğularaq öldürüb.

İstintaq orqanı tərəfindən Bədəlovun barəsində Cinayət Məcəlləsinin 120.2.4-cü (Qəsdən adam öldürmə, xüsusi amansızlıqla və ya ümumi təhlükəli üsulla adam öldürmə) və 120.2.9-cu (Qəsdən adam öldürmə, təqsirkar şəxs üçün aşkar surətdə köməksiz vəziyyətdə olan adamı öldürmə, habelə adam oğurluğu və ya girov götürülməsi ilə bağlı adam öldürmə) maddəsi ilə ittiham elan edilib.

Bədəlov ifadəsində Məmmədovanın "Tik-Tok” sosial şəbəkələrində bir çox videogörüntülərinin yayıldığını deyib.