Sosial verilişlərdə etik qaydalar pozulur - Niyə tədbir görülmür?

 

Bəs maraqlıdır efir etikası və davranışları necə olmalıdır və buna hansı formada nəzarət edirlər.

 

TV eksperti Zeynal Məmmədlinin sözlərinə görə, müasir texnologiyalar imkan verir ki, efirdə səslənən fikirləri 20 saniyə gecikmə ilə efirə verəsən, amma bizdə efirlərin səviyyəsi çox-çox aşağıdır.

 

"Televiziyalarda işə alınan zaman hər bir işçinin efir üçün etik öhdəliyi olur. Sosial mövzulara satirik yanaşsan anlamaq olar. Lakin sənədli qəhrəmanlardan istifadə edərkən ehtiyatlı olmaq lazımdır. Efir redaktoru meneceri var. Hələ kanalın prezidenti var. Görəsən efirlərdə baş verənlərə baxmırlar?! Maraqlıdır tamaşaçılardan iradlar necə toplanır, buna kim nəzarət edir? Bu cür hallara Milli Teleradio Yayım Şurası nəzarət etməlidir. Hətta şurada da kimlərsə cəzalandırılmalıdır", - ekspert deyib. 

Media hüquqşünası Ələsgər Məmmədli isə bildirir ki, sosial verlişlərdə bu cür baş verən hadisələrə görə yalnız zərərçəkən şəxs şikayət etdiyi halda araşdırılma aparıla bilər.

 

"Televiziyalarda etik çərçivə qanunla qorunur. Şərəf və ləyaqəti təhqir və təhdid edən şəxslər barəsində qanunvericilikdə qeyd olunan maddələr üzrə cəza və cərimələr tətbiq olunur. Bu isə məhkəmə qaydası ilə aparılır. Ümumilikdə isə televiziyaların lisenziya şərtləri var. O şərtləri pozanda həmin lisenziya geri də alına bilər. Əgər zərərçəkən hüquqlarının pozulduğunu hesab edirsə bu zaman aidiyyatı üzrə müraciət edə bilər",  - Ələsgər Məmmədli bildirib.  

Audiovizual Şuradan məsələ ilə bağlı anews.az-ın sorğusuna cavab olaraq bildirilib ki, bu cür hallar baş verdiyi üçün televiziyalara xəbərdarlıq göndərilib.

 

"Audiovizual Şurası tərəfindən həyata keçirilən monitorinqləri zamanı canlı yayımlanan bəzi proqramlarda qonaqlar, iştirakçılar, ekspert qismində iştirak edən şəxslər arasında baş verən fiziki toqquşma və davaların, o cümlədən qarşılıqlı təhqirlərin efirə getməsi halları qeydə alınıb. Həmin proqramlarda belə situasiyalar əvvəllər nadir hallarda baş verirdi və Şuranın yayımçılara etdiyi xəbərdarlıqların nəticəsində bu hallar sistematik xarakter almırdı. Lakin son günlər ümumölkə televiziya kanallarının efirlərində canlı yayımlanan proqramlar göstərir ki, belə pozuntuların intensivləşməsi və sistematik hala çevrilməsi baş verir. Azərbaycan Respublikası Audiovizual Şurası yayımçıların diqqətinə çatdırır ki, proqramlarda şəxslər arasında fiziki toqquşma və davaların, o cümlədən qarşılıqlı təhqirlərin efirə getməsi halları bir daha təkrarlanarsa onlara qarşı xəbərdarlıq olunmadan inzibati sanksiyalar tətbiq olunacaq", -  qurumdan bildirilib.