Saxlanılan AXCP üzvü buraxılıb

Mayın 17-də onu mülki geyimli şəxslər saxlayıb.

"Ceyhun bəy bu gün qızını məktəbdən götürərkən 3 nəfər tərəfindən saxlanılıb. Qızına isə deyiblər ki, sən get evə atan tezliklə evə qayıtmayacaq", partiyanın məlumatında qeyd olunub.

Ceyhun Rzayev  cari il mayın 14-də Bakıda "Kriminal dövlət istəmirik!" şüarı ilə keçirilən aksiyaya dəstək olaraq Mingəçevirdə təkadamlıq aksiya keçirib. Daha sonra saxlanılıb və bir müddət sonra isə  sərbəst buraxılıb.

Daxili İşlər Nazirliyinin Mətbuat xidmətinin KİV və İctimaiyyətlə əlaqələr şöbəsinin rəisi Elşad Hacıyev bildirib ki, Rzayev narkotik vasitələrin qanunsuz dövriyyəsində şübhəli bilindiyi üçün saxlanılıb.

"Özünü Azərbaycan Xalq Cəbhəsi Partiyasının üzvü kimi təqdim edən və əvvəllər Cinayət Məcəlləsinin 182, 234, 243 və 244-cü maddələri ilə məhkumluq həyatını yaşayan şəxs narkotik dövriyyəsində şübhəlidir. Hazırda onun barəsində müvafiq araşdırma aparılır. Araşdırma nəticəsindən asılı olaraq əməli tövsif olunacaq. Rzayevin saxlanmasında heç bir siyasi motiv yoxdur", - o bildirib.