Dövlət Məşğulluq Agentliyindən - ŞİKAYƏT

Dövlət Məşğulluq Agentliyi vətəndaşları işlə təmin edə bilmir. Bunu işlə təminatla bağlı Dövlət Məşğulluq Agentliyinə müraciət etmiş şikayətçi Gülüş Səbziyeva bildirib.
 
"Mənə  9 saatlıq iş günü müqabilində  aylıq əmək haqqı 350 manat və ya maksimum 400 manat olan iş yerləri təklif edilir. Tələbə olduğum vaxtlarda Dövlət Məşğulluq Agentliyi məni hər hansı bir işlə təmin etmirdi. Amma indi universiteti bitirdikdən sonra, mənə təklif edilən iş şərtləri də heç ürəkaçan olmayıb. Şikayətim tək maaş və iş saatı ilə bağlı deyil. Tək mən yox, ümumiyyətlə, çox adam bunu bilir ki, Dövlət Məşğulluq Agentliyi təcrübəyə ehtiyac duyulmayan işlərə görə də, təcrübə tələb edir. Əgər mənə tələbəlik illərimdə praktiki iş üçün imkan yaradılmayıbsa və universiteti bitirdikdən sonra ilk dəfə iş üçün müraciət etmişəmsə, həmin sahədə əvvəllər necə iş təcrübəm ola bilər ki?”, - Sebziyeva bildirib. .
 
Mövzu ilə bağlı Dövlət Məşğulluq Agentliyinin mətbuat katibi Əsmər Nizamiqızı deyir ki,  iş üçün müraciət edən şəxslər www.e-sosial.az saytına daxil olaraq, özləri üçün uyğun olan vakansiya üzrə seçim edə bilərlər.
 
"Hər vakansiyaya dair müəyyən bir əmək haqqı nəzərdə tutulub. Müraciət edən şəxsin peşə qabiliyyəti burada əsas götürülür. Əgər vətəndaş üçün vakansiya bankında münasib bir iş yoxdursa, biz onu başqa bir məşğulluq istiqamətinə yönləndiririk. Bizim funksiyamız yalnız vətəndaşı işlə təmin etməkdən ibarət deyil. Həmçinin biz, özünüməşğulluq proqramını həyata keçiririk. Yəni, uyğun vakansiya tapılmayanda, biz həmin şəxsi müəyyən bir peşəyə istiqamətləndirə bilərik.” – o qeyd edib.
 
Dövlət Məşğulluq Agentliyinin bu ilə olan statistikasına görə, 3736 nəfər özünüməşğulluq proqramına qoşulub.
 
Bundan əlavə, bu il üzrə 13736 nəfər isə uyğun vakansiyalar üzrə iş ilə təmin edilib.
 

www.anews.az