Abşeronda piyadanı vuraraq öldürməkdə təqsirləndirilən şəxsə hökm oxunub

Abşeronda piyadanı vuraraq öldürməkdə təqsirləndirilən Tural Məmmədova hökm oxunub və o, 4 il müddətinə azadlıqdan məhrum edilib.

"Report" xəbər verir ki, bu barədə hökm Abşeron rayon Məhkəməsinin hakimi Şövkət Nəcəfovanın sədrliyi ilə keçirilən prosesdə elan olunub.

Hökmə əsasən, təqsirləndirilən şəxs azadlıqdan məhrumetmə cəzasını məntəqə tipli cəzaçəkmə müəssisəsində çəkəcək. T.Məmmədovun barəsində seçilmiş başqa yerə getməmək haqqında iltizam qətimkan tədbiri hökm qanuni qüvvəsini alanadək saxlanılıb.

Hadisə ötən ilin dekabrında Abşeron rayonu, Saray qəsəbəsində yerləşən "Yetər” şadlıq evinin qarşısında qeydə alınıb.

Belə ki, Tural Məmmədov idarə etdiyi "Ford” markalı avtomobillə 1947-ci il təvəllüdlü Əvəz Sevdimaliyevi vurub.


Tural Məmmədova qarşı Cinayət Məcəlləsinin 263.2-ci (Yol hərəkəti və ya nəqliyyat vasitələrinin istismarı qaydalarını pozma, ehtiyatsızlıqdan zərərçəkmiş şəxsin ölümünə səbəb olduqda) maddəsi ilə ittiham irəli sürülüb.

www.anews.az