Şabranın yeni Baş planı müzakirə olunub

Şabranın yeni Baş planı müzakirə edilib. Bu barədə Dövlət Şəhərsalma və Arxitektura Komitəsinin sədri Anar Quliyev özünün sosial şəbəkə hesablarında məlumat verib.

"Şabranın yeni Baş planını rayon icra hakimiyyətində başçının, baş memarın və bələdiyyə sədrinin iştirakı ilə geniş müzakirə etdik, şəhərin inkişafı istiqamətləri, onu təmin edəcək bütün qurumların fəaliyyətinin əlaqələndirilməsi zərurəti barədə ətraflı fikir mübadiləsi apardıq", - A.Quliyev əlavə edib.

Dövlət Şəhərsalma və Arxitektura Komitəsinin sifarişi ilə hazırlanmış Şabran şəhərinin Baş planı Azərbaycan Respublikasının Nazirlər Kabinetinin 29 mart 2022-ci il tarixli müvafiq qərarı ilə təsdiq edilib. Dövlət Baş Layihə İnstitutu tərəfindən hazırlanmış Şabran şəhərinin sayca üçüncü Baş planı 2038-ci ilə qədərki dövrü əhatə edəcək. Yeni ərazi planlaşdırılması sənədində şəhər ərazisinin zonalaşdırılması zamanı prioritet inkişaf istiqamətləri öz əksini tapıb.

Baş plana əsasən hesabat müddətinin sonuna qədər şəhər əhalisinin artaraq 34 500 nəfərə çatması gözlənilir. Əhalinin artım səviyyəsinə əsasən rahat həyat şəraitinin təmin edilməsi üçün müasir yaşayış komplekslərinin inşası, mövcud şəhər infrastrukturunun təkmilləşdirilməsi və adambaşına düşən ümumi yaşayış sahəsinin 18,8 m2-dən 25 m2-ədək artırılması nəzərdə tutulur. Həmçinin iqtisadi imkanların genişləndirilməsi və sakinlərin məşğulluğunun təmin edilməsi üçün sənaye ərazilərinin yenidənqurulması, ictimai-işgüzar zonaların yaradılması planlaşdırılır. Eyni zamanda yaşayış rayonlarında əhalinin mədəni, sosial tələbatının ödənilməsi məqsədi ilə ictimai mərkəzlərin formalaşdırılması, məktəb və bağçaların inşası, məhəllə parklarının salınması təklif edilir.