Həbsdə olan “Nida”çıların valideynləri aclıq aksiyasını dayandırdı

Həbsdə olan “Nida”çıların valideynləri bu gün aclıq aksiyasını dayandırıblar.APA-nın məlumatına görə, həbsdə olan Zaur Qurbanlının anası Səkinə Qurbanova bildirib ki, həbsdə olsan “Nida”çılar onlardan aclığı dayandırmalarını xahiş ediblər: “Hazırda övladlarımız həbsxanada aclıq aksiyasını davam etdirirlər. Lakin onlar bizə müraciət etdilər ki, biz valideyn olaraq aclığı dayandıraq, əks təqdirdə onlar su da içməyəcəklər. Biz də bunu nəzərə alıb, aclıq aksiyasını dayandırmağa qərar verdik. Məhkəmə hökmünə qədər aclığı dayandıracağıq. Lakin hökmdən asılı olaraq, bu aksiyanı davam etdirə bilərik”. Sonra valideynlər həbsdə olan gənclərin azadlığa çıxmasını tələb ediblər. Xatırladaq ki, həbsdə olan “Nida”çılardan 3-nün valideyni 4-cü gün idi ki, aksiyanı davam etdirirdi. Həbs olunanların isə artıq 6-cı gündür ki, aclıq aksiyası keçirdikləri bildirilir. Qeyd edək ki, Ədliyyə Nazirliyi Penitensiar Xidmətinin ictimaiyyətlə əlaqələr şöbəsindən isə APA-ya bildirilib ki, “Nida” Vətəndaş Hərəkatının Bakı İstintaq Təcridxanasında saxlanılan üzvlərinin aclıq aksiyası etməsi barədə olan məlumatlar həqiqəti əks etdirmir.ANNET.Az