Əvəz Hafizlinin məhkəməsinə ilkin baxış keçirilib

Jurnalist Əvəz Hafizlinin məhkəməsinə ilkin baxış keçirilib.  Bu barədə məhkəmədə iştirak edən jurnalist İfadə Cəfərzadə anews.az-a açıqlamasında bildirib.

 

Onun sözlərinə görə məhkəmədə Əvəz Hafizlinin qohumları, vəkili iştirak etməyib. İclasda iştirak etmək istəyən jurnalistin dostlarını isə məhkəməyə buraxmayıblar. 

Növbəti məhkəmə 4 iyun 12:30-a təyin edilib. Məhkəmə onlayn olacaq və açıq keçiriləcəyi gözlənilir.

Bildirilib ki, məhkəmə prosesində iştirak edənlərin sözlərinə görə, mərhumun heç bir ailə üzvü iştirak etməyib.

 

Jurnalist bildirib ki, ilkin baxış mərhələsində Böyük Britaniyanın Azərbaycandakı səfiri də iştirak edib.

Fəallar məhkəmənin binası önündə "Əvəzin qətli siyasidir!" şüarı ilə çıxış ediblər. Onlar növbəti məhkəmə proseslərini də izləyəcəklərini söyləyiblər.

Əvəz Hafizli bu ilin fevralın 22-də əmisi oğlu Əmrulla Güləliyev tərəfindən boğazı kəsilərək öldürülüb. Ölümündən əvvəl dəfələrlə təhdid altında olduğunu bildirərərək aksiyalar keçirmişdi.

İlkin araşdırmalara görə, Əmrulla Güləliyev cinayəti törədərkən sərxoş vəziyyətdə olduğunu, aralarında yaranmış şəxsi mübahisə zəminində törətdiyini etiraf edib.

 

Aytac