Polad Həşimovun anası-Oğlumun qisası alınanda özüm ELAN EDƏCƏM - VİDEO

General Polad Həşimovun qisası tam alınmayıb, bunu KİM-tv-yə açıqlamasında generalın anası Səmayə Həşimova bildirib.

 

"Bİr neçə yerdə də demişəm ki, Polad Həşimovun qisası alınanada mən özüm bunu elan edəcəm. Nə zaman Azərbaycan xalqının içindəki düşmənlər təmizlənsə onda hesab edəcəm ki, Həşimovun qisası alınıb.İçimizdəki ürəkli oğlanları yox daxili düşmənləri təmizləmək lazımdır", deyə Səmayə Həşimova deyib.

 

Sabah 14 iyul general-mayor Polad Həşimovun şəhid olmasından 2 il ötür. O, 2020-ci il iyulun 14-də Tovuz istiqamətində baş verən şiddətli döyüşlər zamanı Ermənistan Silahlı Qüvvələrinin hücum cəhdinin qarşısını alarkən  şəhid olub.

 

Onun şəhid olması xəbərini ictimaiyyətə Müdafiə nazirinin müavini, general-leytenant Kərim Vəliyev çatdırıb. İyulun 14-də general-mayor Polad Həşimovun nəşi əvvəlcə doğulduğu Qəbələ rayonunun Vəndam qəsəbəsinə, sonra isə yaşadığı Sumqayıt şəhərinə gətirilib. General iyulun 15-də II Fəxri Xiyabanda dəfn olunub.

2020-ci il dekabrın 9-da Prezident İlham Əliyevin sərəncamı ilə Polad Həşimova Azərbaycanın Milli Qəhrəman adı verilib.

 

Polad Həşimov 2003-cü ildə mayor qismində Prezident Heydər Əliyevin sərəncamı ilə "Hərbi xidmətlərə görə” medalı ilə təltif edilib. Altı il sonra, 2009-cu ildə isə o, artıq polkovnik-leytenant qismində Prezident İlham Əliyevin sərəncamı ilə "Vətən uğrunda” medalı ilə təltif olunub. 2014-cü il iyunun 25-də III dərəcəli Vətənə xidmətə görə ordeni ilə təltif edilən Polad Həşimov, 2016-cı ilin Aprel döyüşlərində göstərdiyi şücaətə görə 2-ci dərəcəli "Vətənə xidmətə görə” ordeni ilə mükafatlandırılıb.

 

General 2016-cı ilin 2-4 aprelində cəbhə boyu baş verən hərbi əməliyyatlar zamanı Talış qəsəbəsi uğrunda gedən döyüşləri aparan 1-ci Ordu Korpusunun Qərargah rəisi olub və yaralanıb. 2019-cu il iyunun 25-də Polad Həşimova general-mayor ali hərbi rütbəsi verilib. O, daha sonra Azərbaycan Silahlı Qüvvələrinin 3-cü Ordu Korpusunun Qərargah rəisi təyin olunub.

2020-ci ildə Qəbələ şəhərində Şəhidlər xiyabanının yerləşdiyi küçəyə Polad Həşimovun adı verilib. Ötən ildən Bakı şəhərinin küçələrindən biri Azərbaycanın Milli Qəhrəmanının adını daşıyır. Onun adı ötən il təhsil aldığı Sumqayıt şəhəri 28 nömrəli tam orta məktəbə verilib. 

 

Gülnar Nazimqızı