Dünya Startup Yarışmasının Bakı finalı keçirilib - FOTOLAR

Azərbaycan Diplomatiya Akademiyasında “Seedstars” Dünya Startup Yarışmasının Bakı finalı keçirilib. 

Finalda 15 layihə iştirak etmək hüququ qazanıb. Hər bir startup öz layihəsinin təqdimatını keçirib və münsiflər heyətinin layihə ilə əlaqədar suallarını cavablandırıb. 

Bakı turunun nəticələrinə görə, “Manads” layihəsi 1-ci, “Talibro” layihəsi 2-ci, “Loupse” layihəsi isə 3-cü yerə layiq görülüb. 

Birinci yeri tutan tərəf Dünya Startup Yarışmasının final mərhələsində iştirak etmək üçün İsveçrənin Cenevrə şəhərinə dəvətnamə alıb və dünya investorları qarşısında öz layihəsini təqdim edərək 500 min dollara qədər investisiya əldə etmək imkanı qazanıb. İkinci yerin qalibi 1000 AZN məbləğində pul mükafatı, üçüncü yerin qalibi isə sertifikatla təltif olunub. 

Qeyd edək ki, Dünya Startup Yarışmasının Bakı mərhələsini “Azercell” şirkəti, İsveçrənin “Seedstars” şirkəti, Barama İnnovasiya Mərkəzi və ADA Universiteti birgə təşkil edib. Bakı turunun rəsmi sponsoru isə Paşa Bank olub. 

“Seedstars” Dünya Startup Yarışmasında dünya üzrə 30 şəhər iştirak edir. 

ANN.Az