Ölü kimi qeydiyyata alınan Azərbaycan vətəndaşı ilə bağlı - Açıqlama

Baş Prokurorluq Rusiya Federasiyasında yaşayan Zeynalov Abil Hacıbaba oğlunun sağ olmasına baxmayaraq ölüm haqqında şəhadətnamə verilməsinə görə Azərbaycana gələ bilməməsi ilə bağlı məsələyə münasibət bildirib.


Prokurorluğun mətbuat xidməti xəbər verir ki, məlum olum ki, vətəndaş müraciəti əsasında Quba rayonu, Rustov kənd sakini, 1955-ci il təvəllüdlü Abil Zeynalovun itkin düşməsi ilə əlaqədar ölmüş elan edilməsi haqqında Quba rayon məhkəməsi tərəfindən 09 sentyabr 2011-ci il tarixdə qətnamə qəbul edilmiş  və bunun əsasında rayon qeydiyyat şöbəsi tərəfindən A.H.Zeynalovun ölümü haqqında akt tərtib olunub.


Qəbul edilmiş məhkəmə qətnaməsi üçün əsas olmuş arxiv və digər zəruri  sənədlərin həqiqiliyini və  qanuniliyini müəyyən etmək məqsədi ilə hazırda Quba rayon prokurorluğunda araşdırma aparılır.


Nəticəsi barədə ictimaiyyətə əlavə məlumat veriləcək.

26 il əvvəl Rusiyaya gedən Quba rayonunun Rustov kəndində anadan olmuş 1955-ci il təvəllüdlü Abil Zeynalov bir neçə gün əvvəl yerli KİV-ə müraciət edərək Azərbaycanda "ölmüş şəxs” kimi qeydiyyata alındığı üçün sənəd ala bilmədiyini və uzun müddətdir ölkəyə qayıda bilmədiyini bildirib.

www.anews.az