Azərbaycanda Milli Meşə Proqramı hazırlanıb

2022-2030-cu illəri əhatə edəcək proqram müvafiq qurumlarla razılaşdırması üçün aidiyyatı üzrə təqdim edilib.

 

2019-cu ildə Azərbaycan Respublikasında meşələrin mühafizəsi və dayanıqlı inkişafına dair Milli Meşə Proqramının və onun Fəaliyyət Planının ilkin layihəsinin təqdimatı keçirilib.  

 

Milli Meşə Proqramının hazırlanmasında əsas məqsəd meşələrin idarə edilməsi üzrə institutsional və hüquqi bazanın inkişafını təmin etməklə hökumətin meşə siyasətini reallaşdırmaqdan ibarətdir.

 

Azərbaycanda meşələrin ümumi sahəsi 1213,7 min hektardır. Meşə ilə örtülü sahə 1021,88 min hektar təşkil etməklə, ümumi ərazinin 11,8%-dir. Hər adam başına təqribən 0,12 ha meşə sahəsi düşür ki, bu da ümumdünya miqyasında götürülən müvafiq orta rəqəmdən 4 dəfə (0,48 ha) azdır. 

 

Azərbaycanın coğrafi ərazisinin meşə fonduna ayrılan hissəsinin 95 %-i dağlıq ərazilərdə yerləşir. Bunun da 49 %-i Böyük Qafqaz, 34 %-i Kiçik Qafqaz dağları, təxminən 14-15 %-i Talış dağları və yerdə qalan 5 %-i isə Aran rayonlarının payına düşür.