Yevlaxda bir ayın şirkəti 106 minlik tender uddu

Yevlax şəhər Mənzil Kommunal Təsərrüfatı Birliyi (MKTB) tərəfindən keçirilən tender müsabiqəsinin (Açıq tender) qalibi məlum olub.

 

Müsabiqənin şərtlərinə görə, "Orlondo Az” MMC Yevlax şəhər MKTB-yə əkin materialları, gübrələr və digər mallar satacaq və qarşılığında 105 min 800 manat alacaq.

Tender müsabiqəsində diqqət çəkən məqamlardan biri odur ki, qalib şirkət yeni yaranıb.

Yevlax şəhər MKTB tender müsabiqəsini 25.07.2022-ci il tarixində elan edib. Qalib şirkət olan "Orlondo Az” MMC isə bundan cəmi bir ay əvvəl - 20.06.2022-ci il tarixində dövlət qeydiyyatına alınıb.

Nizamnamə kapitalı 5 manat olan MMC-nin hüquqi ünvanı "Qaradağ rayonu, Lökbatan ŞTQ. Keçid 1594, ev 30, m. 8”də yerləşir. Qanuni təmsilçisi Məhərrəmov Rövşən Baladadaş oğludur.

"Dövlət satınalmaları haqqında" Qanunun 6-cı maddəsində malgöndərənlərin (podratçıların) ixtisasına dair tələblər yer alıb. Həmin maddənin 6.2.1-ci bəndində açıq şəkildə yazılır ki, satınalma müqaviləsinin icrasını təmin etmək üçün müvafiq sahədə peşəkarlığının, təcrübəsinin, texniki və maliyyə imkanlarının, işçi qüvvəsinin, idarəetmə səriştəsinin, etibarlığının olması lazımdır.

Cəmi bir ay əvvəl yaranan şirkətlərin hansı peşəkarlığa və təcrübəyə sahib olacağı aydın deyil.

Yevlax şəhərində dövlət qurumları tərəfindən daha əvvəl də yeni yaranan, təcrübəsiz şirkətləri tenderin qalibi elan ediblər.(yeniavaz)