Kömək etmək istəyəndə dedi ki, sizi də öldürərəm - Video

Bakıda küçədə arvadı Nuridə Əhmədovanı bıçaqladıqdan sonra maşınla hadisə yerindən qaçan Araz İsazadə barəsində cinayət işi başlanılıb.

Hadisə şahidləri "ATV xəbər”ə danışıblar.

"Çöldən qadının qışqırıq səsləri gəldi. Maşının qapısı açıq vəziyyətdə idi. Qadını yerə yıxıb döyməyə, saçını yolmağa başladı. Ətrafdakılar ona kömək istəyəndə bıçaqla göstərdi ki, öldürərəm, kimsə yaxın gəlməsin. Qadının boğazının, əlinin, üzünün kəsildiyi halını gördüm”, - onlardan biri deyib.

"Qız yaxınlıqdakı hospitalda işləyir. Elə hospitalın yanında aralarında söz-söhbət olub, camaatın gözü önündə onu vurub”, - digəri bildirib.  

Zərərçəkmişin müalicə olunduğu xəstəxananın baş həkimi Səməd Səmədovun sözlərinə görə, qadın çoxsaylı bədən xəsarətləri alsa da, xoşbəxtlikdən daxili orqanlar zədələnməyib.

Avqustun 30-da 1997-ci il təvəllüdlü Nuridə Əhmədovanın xəsarətlər alması barədə prokurorluğa məlumat daxil olub. Araşdırmalarla zərərçəkmişin əri, 1989-cu il təvəllüdlü Araz İsazadənin küçədə bıçaqla çoxsaylı xəsarətlər yetirərək N.Əhmədovanı qəsdən öldürməyə cəhd edib hadisə yerindən uzaqlaşmasına əsaslı şübhələr müəyyən edilib. Faktla bağlı Cinayət Məcəlləsinin 29, 120.1-ci (qəsdən adam öldürməyə cəhd) maddəsi ilə cinayət işi başlanıb. Araz İsazadə şübhəli şəxs qismində tutularaq istintaqa cəlb edilib. İstintaq davam edir.

www.anews.az